ილია ჭავჭავაძის სახელობის ეროვნული ბიბლიოთეკა 1481 წელს გამოცემული დანტე ალიგიერის „ღვთაებრივი კომედიის შეძენას გეგმავს, რომელიც ამჟამად, საფრანგეთში მცხოვრები ბუკინისტის ჟან-ბაპტისტ დე პროიარის მფლობელობაშია.

წიგნის შესაძენად ეროვნული ბიბლიოთეკა 110 ათასი ევროს გამარტივებულ შესყიდვას ითხოვს.

შესყიდვების სააგენტოში წარდგენილი დოკუმენტაციით ცნობილი ხდება, რომ ეს გამოცემა ამ ნაწარმოების მეორე გამოცემაა, მაგრამ მის მშობლიურ ქალაქში პირველად გამოიცა. გამოცემა ფოლიოს ფორმატშია დაბეჭდილი და ახლავს აღორძინების ეპოქის ერთ-ერთი უდიდესი მხატვრის, სანდრო ბოტიჩელის, ჩანახატებზე დაფუძნებული ბაჩო ბალდინის გრავირებული ილუსტრაციები. წიგნი წარმოადგენს ინკუნაბულას, ნაბეჭდ გამოცემას, რომელიც ხელითაა აწყობილი.

“ის ფაქტი, რომ საქართველოს ეროვნულმა ბიბლიოთეკამ გადაწყვიტა და აქვს 1481 წელს გამოცმული ინკუნაბულას შეძენის შესაძლებლობა, ისტორიული მნიშვნელობისაა. იგი ღირსეულ ადგილს დაიკავებს წიგნის მუზეუმის უნიკალურ კოლექციაში, რაც აამაღლებს ბიბლიოთეკის კულტურულ ავტორიტეტს საერთაშორისო ასპარეზზე”, - აცხადებს ეროვნული ბიბლიოთეკა, რომელიც თვლის, რომ მიზანშეწონილია დანტე ალიგიერის „ღვთაებრივი კომედიის“ ექსკლუზივის წესით შესყიდვა.

ქუთაისის საერთაშორისო აეროპორტს ახალი მიმართულება, ვენეცია დაემატება. ინფორმაციას ამის შესახებ საქართველოს აეროპორტების გაერთიანება ავრცელებს.

აეროპორტების გაერთიანების ცნობით, 2 დეკემბრიდან ავიარესიებს კომპანია „ვიზეარი“  Airbus A321neo ტიპის ხომალდით  შეასრულებს.

„ავიაკომპანია Wizz Air რეისებს ვენეცია-ქუთაისი-ვენეციის მიმართულებით კვირაში ორი სიხშირით, სამშაბათსა და შაბათს შეასრულებს. ინტენსიური მოლაპარაკებები საქართველოს აეროპორტების გაერთიანებამ ავიაკომპანიასთან წარმატებით დაასრულა. ბილეთების შეძენა ავიაკომპანიის ვებგვერდზეა შესაძლებელი.

ზაფხულის სანავიგაციო სეზონის დასაწყისში, Wizz Air-მა ქუთაისის საერთაშორისო აეროპორტში მადრიდისა და ჰამბურგის მიმართულებები აღადგინა, ხოლო ივნისიდან სრულიად ახალი,  ლიონის მიმართულებით დაიწყო კვირაში ორი სიხშირით პირდაპირი რეგულარული რეისების შესრულება.

2022 წლიდან ავიაკომპანია საქართველოს ავიაბაზრის ლიდერის პოზიციას ინარჩუნებს. 2025 წლის 7 თვის მონაცემებით Wizz Air საქართველოში 900 ათასამდე მგზავრს მოემსახურა. მხოლოდ 2025 წლის პირველი შვიდი თვის განმავლობაში კი, ავიაკომპანიამ ქუთაისიდან და პირიქით, დაახლოებით 4 800 რეისი შეასრულა, რაც გასული წლის იგივე პერიოდთან შედარებით, თითქმის 9%-ით მეტია.

ამ ეტაპზე, Wizz Air ქუთაისის საერთაშორისო აეროპორტიდან ფრენებს ევროპისა და ახლო აღმოსავლეთის 13 ქვეყნის 24 მიმართულებით ასრულებს“, – ნათქვამია აეროპორტების გაერთიანების გავრცელებულ ინფორმაციაში.

აფხაზეთში საომარი მოქმედებების დაწყებიდან 33 წელი გავიდა.

საომარი მოქმედებები აფხაზეთში 1992 წლის 14 აგვისტოს დაიწყო, საქართველოს შეიარაღებული ძალები ტერიტორიაზე რკინიგზის დაცვის მიზნით შევიდნენ. ომის ძირითადი ფაზა 13 თვე და 13 დღე გაგრძელდა და 1993 წლის 27 სექტემბერს სოხუმის დაცემით დასრულდა. სოხუმის დაცემას წინ უძღოდა რუსეთის მონაწილეობით მხარეებს შორის მოლაპარაკებები.

27 ივლისს ხელი მოეწერა სოჭის ხელშეკრულებას, რომელიც აფხაზურმა მხარემ ცალმხრივად დაარღვია, როდესაც ქართულ მხარეს აფხაზეთიდან გამოყვანილი ჰყავდა მძიმე სამხედრო ტექნიკა.

ომის შედეგად აფხაზეთის ტერიტორიის დატოვება 300 ათასამდე ადამიანს მოუწია. საომარი მოქმედებების შედეგად ქართული მხრიდან, ჯარისკაცებისა და მშვიდობიანი მოსახლეობის სახით, 10 ათასამდე ადამიანი დაიღუპა.

თქვენი დაკავების, ან ნებისმიერი კანონდარღვევის შემთხვევაში, შესაძლოა, გაგიუქმდათ ვიზა - ამის შესახებ საქართველოში აშშ-ის საელჩო სოციალურ ქსელში წერს და მოქალაქეებს ახსენებს, რომ ამერიკის ვიზა არის პრივილეგია და არა უფლება.

"ამერიკის შეერთებული შტატების კანონების დარღვევამ, შესაძლოა სერიოზული შედეგი იქონიოს თქვენს ვიზაზე. თქვენი დაკავების, ან ნებისმიერი კანონდარღვევის შემთხვევაში, შესაძლოა, გაგიუქმდათ ვიზა, გაგაძევონ ქვეყნიდან და ვეღარ შეძლოთ აშშ-ის ვიზის მიღება მომავალში.

დაიცავით წესები და არ დააყენოთ თქვენი მოგზაურობა რისკის ქვეშ. ამერიკის ვიზა არის პრივილეგია და არა უფლება", - წერია აშშ-ის საელჩოს განცხადებაში.