ეს ომი მხოლოდ პოლიტიკური განცხადებებით არ შეწყდება, რეალური ნაბიჯებია საჭირო, ქმედებებს მთელი მსოფლიოსგან ველოდებით - ვოლოდიმირ ზელენსკი

უკრაინის პრეზიდენტის, ვოლოდიმირ ზელენსკის განცხადებით, დიპლომატიის ახალი შესაძლებლობების გახსნის ერთადერთი გზა არის მკაცრი ზომები ყველა იმ პირის წინააღმდეგ, ვინც აფინანსებს რუსეთის არმიას და  საბანკო და ენერგეტიკული სფეროებში ეფექტური სანქციები თვით მოსკოვის წინააღმდეგ.

ზელენსკი გამოეხმაურა რუსეთის მიერ უკრაინაზე მორიგ მასშტაბურ თავდასხმებს. როგორც უკრაინის პრეზიდენტი წერს, ზაპოროჟიეში საცხოვრებელ კორპუსზე რუსული იერიშის შედეგად დაიღუპა ერთი ადამიანი და დაშავდა ათობით მოქალაქე, მათ შორის ბავშვებიც.

„ეს ომი მხოლოდ პოლიტიკური განცხადებებით არ შეწყდება, რეალური ნაბიჯები სჭირდება. ჩვენ ქმედებებს ველოდებით აშშ-სგან, ევროპისგან და მთელი მსოფლიოსგან“, – წერს ზელენსკი სოციალურ ქსელში.