დაკავებული პოლიტიკოსების პატიმრობის მიზეზი იყო მათი მხრიდან პარლამენტის არაღიარება, დემოკრატიული სისტემის არაღიარება და ეს პრინციპი მოქმედებს ყველა ქვეყანაში, - ამის შესახებ საქართველოს პრემიერ-მინისტრმა ირაკლი კობახიძემ გადაცემა „იმედი LIVE-ში“ განაცხადა.

როგორც მთავრობის მეთაურმა აღნიშნა, მათმა პატრონებმა გარედან გადაწყვიტეს, რომ ისინი არ უნდა შესულიყვნენ პარლამენტში და უნდა შესულიყვნენ ციხეში.

„თავისი არსით, პოლიტიკოსები, რომლებიც ციხეში არიან ხელისუფლებას არ დაუპატიმრებია. ყველა ვხედავდით, როგორ ვითარდებოდა პროცესები და, მათ შორის, ყველა ხედავს იმას, თუ რა იყო მათი პატიმრობის მიზეზი. რეალურად, პატიმრობის მიზეზი იყო მათი მხრიდან პარლამენტის არაღიარება, დემოკრატიული სისტემის არაღიარება და ეს პრინციპი მოქმედებს ყველა ქვეყანაში. თუ პოლიტიკოსი არ აღიარებს დემოკრატიულ სისტემას, რა თქმა უნდა, კონკრეტულ შემთხვევებში, მას შეიძლება, მოუწიოს წასვლა სასჯელაღსრულების დაწესებულებაში და, სწორედ, მათმა პატრონებმა გააკეთეს ეს - არ შეიყვანეს პარლამენტში და შეიყვანეს ციხეში. მათ სცადეს, ვა-ბანკზე წავიდნენ, ხედავდით, პრაქტიკულად, ისტერიული კამპანია იწარმოებოდა არჩევნებამდე. მთელი, ასე ვთქვათ, ბიუროკრატია იყო ჩართული ქართულ, დემოკრატიულ არჩევნებში. გამოდიოდნენ რუსთაველის გამზირზე, სცენაზე ადიოდნენ არამარტო პარლამენტარები. უცხოელი პარლამენტარი რომ გამოდის სცენაზე და პოლიტიკური განცხადებებით, საარჩევნო განცხადებებით საუბრობს, ამას არაუშავს. ესეც, რა თქმა უნდა, უხეში ჩარევაა ქართულ დემოკრატიაში, მაგრამ პარლამენტარია და არ მოეთხოვება იმდენი, რამდენიც სხვა პოლიტიკოსს, მაგრამ საგარეო საქმეთა მინისტრები გამოვიდნენ სცენაზე, რუსთაველის გამზირზე და პირდაპირ საარჩევნო მოწოდებებით მიმართეს რადიკალური ოპოზიციის ამომრჩევლებს. ამის შემდეგ, პირდაპირ ევროკავშირის ელჩი გამოვიდა არჩევნებამდე რამდენიმე დღით ადრე და ამომრჩევლებს მოუწოდა მობილიზებისკენ „ქართული ოცნების“ ხელისუფლების წინააღმდეგ. აბსოლუტური ისტერიკა იყო. ამის ლოგიკური გაგრძელებაა ის, რაც ხდება. ვერ შეეგუვნენ იმას, რომ ქართველმა ხალხმა მაინც მხარი დაუჭირა მოქმედ ხელისუფლებას და იმ კურსს, რომელიც ამ ხელისუფლებას ჰქონდა და აქვს აღებული და, საბოლოო ჯამში, ამ ფონზე, გააგრძელეს ეს დელეგიტიმაციის კამპანია. ზუსტად ამ ფონზე არ შეიყვანეს პარლამენტში საკუთარი მონები, საკუთარი აგენტები და შეიყვანეს ციხეში. მათ გადაწყვიტეს, რომ ისინი, მათი აგენტები, არ მისულიყვნენ საპარლამენტო საგამოძიებო კომისიის სხდომაზე. მათ მიიღეს ყველა გადაწყვეტილება - პარლამენტში არშეყვანასთან დაკავშირებით უცხოელმა პატრონებმა მიიღეს გადაწყვეტილება და ციხეში შეყვანასთან დაკავშირებითაც უცხოელმა პატრონებმა მიიღეს გადაწყვეტილება. მათ რომ ეთქვათ, ეს პოლიტიკოსები შევიდოდნენ პარლამენტში, არც ბოიკოტირება მოუწევდათ პარლამენტის საგამოძიებო კომისიის, არც ციხეში შესვლა მოუწევდათ, მაგრამ გარედან პატრონებმა გადაწყვიტეს, რომ ისინი არ უნდა შესულიყვნენ პარლამენტში და უნდა შესულიყვნენ ციხეში. ესეც ისტერიკის გამოვლინებაა, არაფერში აწყობდათ ეს ყველაფერი, მაგრამ მოხდა ის, რაც მოხდა,“- განაცხადა პრემიერმა.

როგორც მთავრობის მეთაურმა აღნიშნა, წინა ხელისუფლების დანაშაულების გახსენება პარლამენტის საგამოძიებო კომისიაზე პრინციპულად მნიშვნელოვანი იყო. 

„ყველას რაღაც დონეზე გვავიწყდება რაღაცები, მათ შორის წინა ხელისუფლების უმძიმესი დანაშაულები, თუნდაც ემოციურ დონეზე, ნებისმიერ ჩვენგანს შეიძლება, დაგვავიწყდა მთელი რიგი დანაშაულები, რომელიც ჩაიდინა მაშინდელმა რეჟიმმა და ამ ყველაფრის გასახსენებლად ეს კომისია იყო პრინციპულად მნიშვნელოვანი. ნახეთ, რა ტიპის დანაშაულებზე იყო საუბარი ამ კომისიის ფორმატში. უმძიმესი დანაშაულები, ეს ეხებოდა, მათ შორის ბიზნესის რეკეტს, მათ შორის ადამიანების წამებას, ციხეებში შექმნილ მდგომარეობას, ტელევიზიების მიტაცებას, 2008 წლის ომს და ა.შ. უამრავი დანაშაული, უმძიმესი დანაშაულები და ეს გავიხსენეთ ჩვენ სწორედ ამ კომისიის წყალობით“, - განაცხადა პრემიერ-მინისტრმა. 

მისივე თქმით, ასევე კომისიის წყალობით შესაძლებელი გახდა იმის გახსენება, თუ რას აკეთებდნენ იგივე ძალები გასული წლების განმავლობაში, როდესაც ისინი უკვე ოპოზიციის რიგებიდან ვნებდნენ ქვეყანას, ეწეოდნენ საბოტაჟს.

„ამ ყველაფრის გახსენება იყო ძალიან მნიშვნელოვანი და საბოლოოდ მნიშვნელოვანია დასკვნა იმასთან დაკავშირებით, თუ როგორ უნდა შეფასდეს ეს რეჟიმი და ეს კოლექტიური პოლიტიკური ძალა. ამ დასკვნის საფუძველზე ჩვენ გვაქვს იმედი, რომ მომზადდება სარჩელი საკონსტიტუციო სასამართლოსთვის, რომლის საფუძველზეც დაიწყება მსჯელობა კონკრეტული პარტიების არაკონსტიტუციურად გამოცხადებასთან დაკავშირებით. ეს არის სამართლებრივი პროცესი, რომელიც უნდა დასრულდეს შესაბამისი შედეგით. ცოტა ხნის წინ, გერმანიაში აიკრძალა ერთ-ერთი საზოგადოებრივ-პოლიტიკური გაერთიანება, რომ ნახოთ ამ გაერთიანების არაკონსტიტუციურად გამოცხადების საფუძვლები გერმანიაში, ზუსტად იმეორებს იმას, რასაც აკეთებენ ეს რადიკალური პარტიები ჩვენს ქვეყანაში. მე ვფიქრობ, ყველანაირი საფუძველი არსებობს იმისათვის, რომ მომზადდეს დახვეწილი სარჩელი, რომელიც შევა საკონსტიტუციო სასამართლოში და ეს კოლექტიური პოლიტიკური ძალა, ერთხელ და სამუდამოდ უნდა ჩამოშორდეს ქართულ პოლიტიკას იმისათვის, რომ საბოლოოდ გაჯანსაღდეს ჩვენი დემოკრატიული სისტემა“, - განაცხადა ირაკლი კობახიძემ.

როგორც ირაკლი კობახიძემ აღნიშნა, მთავარი არის, რომ სახელმწიფო ჰქონდეს მკაფიო პოლიტიკა ამ ყველაფერთან დაკავშირებით.

„აღრიცხვაც მნიშვნელოვანია იმისათვის, რომ ეფექტურად ებრძოლო ნარკომანიას. ეს არის პრობლემური საკითხი. ამასთან დაკავშირებით სტატისტიკური ინფორმაციაც არ აქვს მკაფიოდ სახელმწიფოს. ყველა ამ მიმართულებით გვექნება შედეგები და ეს არის ძალიან მნიშვნელოვანი. ვიღაცებს სურდათ საქართველოში წაეხალისებინათ ნარკოტიკის მოხმარება, ესეც არის ლიბერალური დღის წესრიგის ერთ-ერთი მთავარი ხაზი, ესეც იგივე ხელით არის დალაგებული ვინც ჩვენ გვედავება დემოკრატიულ უკუსვლას, ვინც ცდილობს საქართველოში რევოლუციის მოწყობას, ვინც ცდილობს იდეოლოგიურად ჩვენი თანამოქალაქეების, მათ შორის ახალგაზრდების მოწამვლას, ზუსტად იგივე ადამიანები ავრცელებენ ჩვენს ქვეყანაში ნარკოტიკებს. ეს არის ე.წ. ლიბერალური ხაზი. აქაც ვერ ვიქნებით ჩვენ ვერც ტოლერანტები და ვერც გულხელდაკრეფილი, აქაც დაგვჭირდება კონკრეტული ნაბიჯების გადადგმა“, - განაცახადა ირაკლი კობახიძემ.

მთავრობის მეთაურმა აღნიშნა, რომ ქვეყანამ გასული ოთხი წლის განმავლობაში რევოლუციის ოთხი მცდელობა გამოიარა, რომელიც გარედან დაგეგმილი და კოორდინირებული იყო და რომლის ერთ-ერთ ინსტრუმენტს პოლიციელებზე თავდასხმა წარმოადგენდა.

„როდესაც ჩვენ მივიღეთ კანონი, რომელიც უზღუდავდა ადამიანებს პოლიციელებზე თავდასხმას, ეს მონათლეს, როგორც ანტიდემოკრატიული ნაბიჯი, დემოკრატიული უკუსვლა და ა.შ. შენ უნდა გქონდეს იმის უფლება, რომ ხელი გაარტყა პოლიციელს, შეაფურთხო პოლიციელს და იმან რეაქცია არ უნდა მოგცეს. ეს არის „დემოკრატია“ მათ გაგებით და თუ ამას ზღუდავ, ეს ყოფილა არადემოკრატიული ნაბიჯი. რევოლუციის ერთ-ერთი მთავარი ინსტრუმენტი რა არის - უნდა გაარტყა პოლიციელს, შეაფურთხო პოლიციელს, პოლიციელი უნდა იყოს დაკნინებული. ასეთი პოლიციელის შექმნა უნდოდათ მათ თავის დროზე გახარიას მეშვეობით, როცა აჰყავდა მაგალითად პანკისში სპეცრაზმი და შეურაცხყოფილს უწევდა წამოსვლა სპეცრაზმს პანკისიდან. რატომ? იმიტომ, რომ მაშინ ასეთი მენეჯმენტი იყო, აგენტურა იყო შინაგან საქმეთა სამინისტროს ხელმძღვანელობაში. გახსოვთ ბასიანის მოვლენები, სხვა მოვლენები, როცა შეგნებულად, კონკრეტული აგენტი შეურაცხყოფილს ტოვებდა პოლიციელებს. ეს არის რევოლუციის ერთ-ერთი მთავარი ინსტრუმენტი - კანონი არ უნდა იცავდეს პოლიციელს არც შეფურთხებისგან, არც ხელის გარტყმისგან, არც შეურაცხყოფისგან, არაფრისგან და შენ თუ ამისგან იცავ პოლიციელს, ეს არის თურმე არადემოკრატიული ნაბიჯი. ეს ხომ სირცხვილია“, - განაცხადა პრემიერ-მინისტრმა.

ირაკლი კობახიძის თქმით, რევოლუციების მეორე ინსტრუმენტია ქვეყანაში სიძულვილის ხელოვნურად გაღვივება გარედან და ამას აკეთებენ სოცმედიის, მედიის თუ უამრავი სხვა საშუალებით.

„პოლიტიკოსებზე, სამართალდამცავებზე ქუჩაში თავდასხმა, შეურაცხყოფა, უშვერი სიტყვებით გინება, ფურთხება და ა.შ. არის დემოკრატია და ამას თუ უპირისპირდები, ეს ყოფილა ანტიდემოკრატიული ნაბიჯი. ძალიან დიდი ბოდიშის მოხდით, ჩვენ ვერავის მივცემთ იმის საშუალებას, რომ დააკნინოს საქართველოში პოლიცია, ძალოვანი სტრუქტურები. ძალოვანი სტრუქტურები არის ის, რაზეც დგას ნებისმიერი ჯანმრთლი სახელმწიფო. როგორც კი შენ ვიღაცას აძლევ ძალოვანი სტრუქტურების დაკნინების საშუალებას, მაშინვე იშლება სახელმწიფო და ამას ცდილობდნენ ოთხი წლის განმავლობაში და უფრო ადრეც მთელი ამ წლების განმავლობაში. კანონი დაიცავს პოლიციას. კანონი დაიცავს სამართალდამცავ უწყებებს და კანონი დაიცავს ჩვენს საზოგადოებას სიძულვილის ხელოვნურად გაღვივებისგან. ეს არ ხდება მარტო საქართველოში. ხშირად ვიხსენებ სლოვაკეთის პრემიერ-მინისტრ რობერტ ფიცოს ცნობილ 10-წუთიან ვიდეოჩანაწერს, სადაც ის დეტალურად საუბრობს იმასთან დაკავშირებით, თუ რა ხდება სლოვაკეთში. ზუსტად იგივე. სახელმწიფო ინსტიტუტებზე თავდასხმა, სიძულვილის ხელოვნურად გაღვივება, ხელწერა არის ერთი და იგივე. ყველაფერი გარედან თავსმოხვეული. ჩვენ გვინდა სიძულვილი ან სახელმწიფო ინსტიტუტების დაკნინება? როდესაც ჩვენ ვიცავთ სახელმწიფო ინსტიტუტებს, მათ შორის ძალოვან სტრუქტურებს, როდესაც ვიცავთ საზოგადოებას სიძლვილის გაღვივებისგან, ამას უწოდებენ დემოკრატიულ უკუსვლას. ეს ყველაფერი ხომ ხელისგულზე დევს. ჩვენი ვალია ამ ქვეყნის წინაშე, რომ დავიცვათ სიძულვილის ხელოვნურად გაღვივებისგან ჩვენი საზოგადოება და არა მარტო სახელმწიფოპ ინსტიტუტები, არამედ სოციალური ინსტიტუტები, მათ შორის ჩვენი ეკლესია. რამხელა გარედან დაფინანსებული კამპანიები ჰქონდათ ეკლესიის და სახელმწიფო ინსტიტუტების წინააღმდეგ, ყველაფერ იმის წინააღმდეგ, რასთანაც დაკავშირებულია ჩვენი სახელმწიფოს და ქვეყნის იდენტობა. რა თქმა უნდა, ამის საშუალებას ვერ მივცემთ. როცა ამას ვიღაცები უწოდებენ დემოკრატიულ უკუსვლას, ეს ძალიან კარგად მეტყველებს მათ განზრახვაზე. მათ უნდათ, ოთხი მცდელობის შემდეგ კიდევ ერთი, რევოლუციის მეხუთე მცდელობა მოაწყონ ჩვენს ქვეყანაში, რასაც ვერ ეღირსებიან. სახელმწიფო ბოლომდე გაიმყარებს საკუთარ პოზიციებს. ეს არის ის უალტერნატივო გზა, რომელსაც ჩვენ მივყვებით, მათ შორის იმ კანონების მიღებით, რომლებიც დაამტკიცა საქართველოს პარლამენტმა გასული თვეების განმავლობაში“, - აღნიშნა ირაკლი კობახიძემ. 
ჩორჩანასთან დაკავშირებით საქმე ეხება მილიონ კვადრატულ მეტრს, რომელიც ჩააბარა გახარიამ ძალიან საეჭვო გარემოებებში, - ამის შესახებ საქართველოს პრემიერ-მინისტრმა ირაკლი კობახიძემ იმედი LIVE-ში  განაცხადა.

პრემიერის თქმით, ეს იყო ჩვეულებრივი ღალატი და დანარჩენი უნდა დაადგინოს გამოძიებამ.  

„რაც შეეხება ჩორჩანას, ეს არის უმძიმესი დანაშაული. დღეს ჩვენი სახელმწიფო არის დამოუკიდებელი და სუვერენული, როგორც არასდროს, მაშინ დაიწყო გამოძიება ჩორჩანას საკითხთან დაკავშირებით. გამოძება არის აუცილებელი. საქმე ეხება მილიონ კვადრატულ მეტრს, რომელიც ჩააბარა გახარიამ ძალიან საეჭვო გარემოებებში. მთელი პიარ კამპანიით დადგეს საგუშაგო პუნქტი და ამას მოჰყვა ჩვენი მილიონი კვადრატული მეტრის მიტაცება. მაშინ, „ნაცმოძრაობის“ კუთვნილ მედიას საერთოდ არ აუტაცებია ეს თემა. ჩვენს ხელისუფლებას რომ დაემართოს ასეთი რამ, რომ გადავდგათ უგუნური და მოღალატეობრივი ნაბიჯი და ამის გამო დავკარგოთ მილიონი კვადრატული მეტრი, რამხელა ამბავს ატეხდა მთელი ოპოზიციური მედია. არავის ხმა არ ამოუღია. იმიტომ, რომ მათ ჰყავთ ერთი პატრონი. გარე დავალება შეასრულა გახარიამ, იგივე გარე დავალებების მიმღებმა ტელევიზიებმა არ აწიეს ეს თემა. არც ერთ მათგანს ხმა არ ამოუღია, ბოლომდე გადაეფარნენ და დაიცვეს გახარია. იმიტომ, რომ მათ ჰყავდათ ერთი პატრონი. ეს იყო ჩვეულებრივი ღალატი, დანარჩენი უნდა დაადგინოს გამოძიებამ“, - განაცხადა პრემიერმა.

პრემიერის თქმით, დაპირება იყო, რომ მმართველი გუნდი  გაანეიტრალებდა რადიკალურ პოლიტიკურ ძალებს ქართულ პოლიტიკაში და ეს დაპირება უნდა შესრულდეს.

„ოპოზიციამ სინამდვილეში კარგად იცის, რომ ჩვენთვის სულ ერთია, ისინი მიიღებენ თუ არა არჩევნებში მონაწილეობას. რაც შეეხება განხეთქილებას რადიკალური ოპოზიციის პარტიებს შორის, ამას აქვს ერთადერთი, კლასიკური მიზეზი - ეს არის სისუსტე. რადიკალური ოპოზიცია არის რადიკალურად დასუსტებული და სწორედ ეს არის განხეთქილების მიზეზი პოლიტიკურ პარტიებს შორის. თვითონ არ იციან, რა ქნან -  ვერც აქციებს აწყობენ, აქციებზე  ვერც კი გამოდიან სცენაზე. 2000 კაცი შეიკრიბა რამდენიმე დღის წინ რადიკალური ოპოზიციის მიერ და იქაც კი ვერ გაბედეს სცენაზე ასვლა. ეს არის ძალიან კარგი იმისათვის, რომ საბოლოოდ გაიწმინდოს ჩვენი დემოკრატიული სისტემა. თუ არ ჩამოშორდა ეს აბსოლუტურად რეპუტაცია გაცვეთილი ხალხი ქართულ პოლიტიკას, ჩვენთან სრულფასოვანი დემოკრატიული სისტემა ვერ შედგება. ამიტომ, სწორი მიმართულებით ვითარდება პროცესები. ჩვენი დაპირება იყო, პირადად ჩემი დაპირებაც, რომ ჩვენ გავანეიტრალებდით რადიკალურ პოლიტიკურ ძალებს ქართულ პოლიტიკაში და რა თქმა უნდა, ეს დაპირება უნდა შესრულდეს. ეს დაპირება თავისთავად არის პრინციპული მნიშვნელობის, იმისათვის, რომ საქართველოში ერთხელ და სამუდამოდ ჩამოყალიბდეს ჯანსაღი პოლიტიკური სისტემა“, - განაცხადა პრემიერმა.

როგორც მთავრობის მეთაურმა აღნიშნა, ნურავინ ნუ გადააბრალებს პატიმრობას იმ სრულ პოლიტიკურ ფიასკოს, რომლის წინაშეც ისინი დადგნენ. 

„არჩევნებში მონაწილეობის უფლება დაპატიმრებულ პოლიტიკოსებს რჩებათ, გასაგებია, რომ კამპანიის ჩატარების შესაძლებლობა არის შეზღუდული პატიმრობის პირობებში, მაგრამ ზოგადად სპეკულაციები ამასთან დაკავშირებითაც იყო და ამიტომ ვაზუსტებ, არჩევნებში მონაწილეობა შეუძლიათ დაპატიმრებულ პოლიტიკოსებსაც. მათ შეუძლიათ, კენჭი იყარონ არჩევნებში და გადაამოწმონ ქართული საზოგადოების ნდობა. არის ხოლმე ასეთი პრაქტიკა, როდესაც ადამიანი ციხეში ზის, შეიძლება, თანაგრძნობა მის მიმართ გაიზარდოს, აბა გადაამოწმონ, ნახონ. თუმცა ნახეთ, როგორია თანაგრძნობა ამ პოლიტიკოსების მიმართ, 2000 კაცი ვერ გამოიყვანეს აქციაზე. 4 პარტია, 40 NGO და „დიფ სთეითი“, უცხოური ბიუროკრატია და ჩინოვნიკები, ყველა ერთად დაირაზმა და 2000 კაცზე მეტი ვერ შეკრიბეს რუსთაველის გამზირზე. ნული თანაგრძნობა, ამიტომ გინდა ციხეში იყვნენ, გინდა ციხის გარეთ, არც ერთი ფორმით ამ ადამიანებს არ აქვთ არავითარი წარმატების შანსი. ნურავინ ნუ გადააბრალებს პატიმრობას იმ სრულ პოლიტიკურ ფიასკოს, რომლის წინაშეც ისინი დადგნენ“, - განაცხადა პრემიერ-მინისტრმა.