ირანის პირობა იყო, რომ ჰორმუზის სრუტეს გახსნიდნენ, მაგრამ ეს არ გააკეთეს, მოგვატყუეს - ტრამპი

ჰორმუზის სრუტესთან დაკავშირებით ბევრი ძალიან კარგი რამ ხდება, – ამის შესახებ აშშ-ის პრეზიდენტმა, დონალდ ტრამპმა განაცხადა.

მისი თქმით, ირანი ნავთობის გაყიდვას ვერ შეძლებს.

„ბევრი გემი მიემართება ჩვენი ქვეყნისკენ, რათა აიღონ ნავთობი, შემდეგ კი წავიდნენ და ის წაიღონ. ასე რომ, ისინი არ გაივლიან ჰორმუზის სრუტეს და საბოლოოდ ეს გამოსწორდება“, – განაცხადა დონალდ ტრამპმა.

ამასთან, აშშ-ის პრეზიდენტი დონალდ ტრამპი აცხადებს, რომ არ აინტერესებს, დაუბრუნდება თუ არა ირანი მოლაპარაკებების მაგიდას. მისი თქმით, სულერთია, რადგან მათი შეიარაღებული ძალები აღარ არსებობს, მათი რაკეტები კი დიდწილად ამოწურულია.

„მათ დაარღვიეს პირობა. მათი პირობა იყო, რომ ჰორმუზის სრუტეს გახსნიდნენ, მაგრამ ეს არ გააკეთეს. მათ მოგვატყუეს“, – აღნიშნა ტრამპმა.

როგორც აშშ-ის პრეზიდენტმა განაცხადა, ირანი ახლა ძალიან ცუდ მდგომარეობაშია.

„ვფიქრობ, ისინი ძალიან სასოწარკვეთილები არიან. ჩვენ გვქონდა შეხვედრა, რომელიც 21 საათს გაგრძელდა. ჩვენ ყველაზე უკეთ გვესმის სიტუაცია და ირანი ძალიან ცუდ მდგომარეობაშია“, – განაცხადა ტრამპმა.

გარდა ამისა, ტრამპმა კიდევ ერთხელ აღნიშნა, რომ ირანს ბირთვული იარაღი არ ექნება.

„მათ ამის მიღების შანსი არ აქვთ, მათ მაინც სურთ ეს და მათ ეს გუშინ ღამით ნათლად განაცხადეს. ირანს ბირთვული იარაღი არ ექნება“,  – განაცხადა დონალდ ტრამპმა.