აზერბაიჯანული მხარის ინფორმაციით, ქვეყნის პრემიერ-მინისტრ ალი ასადოვსა და საქართველოს პრემიერ-მინისტრ ირაკლი კობახიძეს შორის თურქეთის სამხედრო-სატრანსპორტო თვითმფრინავის ჩამოვარდნასთან დაკავშირებით საუბარი შედგა.
აზერბაიჯანული მედიის ცნობით, პრემიერ-მინისტრმა ალი ასადოვმა განაცხადა, რომ ბაქო მზადაა, უზრუნველყოს ყველა საჭირო მხარდაჭერა კატასტროფის შედეგების ლიკვიდაციის, საძიებო-სამაშველო ოპერაციის სამუშაოებისთვის, ასევე შემთხვევის ადგილზე გაგზავნოს აზერბაიჯანის საგანგებო სიტუაციების სამინისტროს პერსონალი და მიიღოს სხვა საჭირო დამხმარე ზომები.
მედიის ცნობით, ქართულმა მხარემ მადლიერება გამოხატა ამ მხარდაჭერისთვის და აღნიშნა, რომ ამჟამად ადგილზე მუშაობენ საქართველოს შესაბამისი უწყებების წარმომადგენლები.
საუბრისას ხაზგასმით აღინიშნა, რომ აზერბაიჯანის საგანგებო სიტუაციების სამინისტრო და ციფრული განვითარებისა და ტრანსპორტის სამინისტრო კონტაქტზე არიან თავიანთ ქართველ კოლეგებთან.
მხარეები შეთანხმდნენ, რომ გააგრძელებენ ტრაგედიასთან დაკავშირებით კონტაქტს.