საქართველოსა და საბერძნეთის ნაკრებების მატჩისას მიღებული ტრავმის გამო ხვიჩა კვარაცხელია იტალიის ჩემპიონატში „ატალანტასთან“ ვერ ითამაშებს – ინფორმაციას „ნაპოლის“ პრესსამსახური ავრცელებს.

„სანაკრებო თამაშებიდან დაბრუნების შემდეგ ხვიჩა კვარაცხელიას სამედიცინო შემოწმება ჩაუტარდა. გამოკვლევის შედეგად გამოვლინდა მარცხენა ბარძაყის კუნთის კონტრაქტურა. კვარაცხელია ინდივიდუალურად ვარჯიშობს და პარალელურად მკურნალობს. თამაშის სურვილის მიუხედავად, „ნაპოლის“ ექიმებმა ამჯობინეს, ფეხბურთელის ჯანმრთელობით არ გაერისკათ და მას „ატალანტასთან“ თამაშის უფლება არ მისცეს“, – ვკითხულობთ „ნაპოლის“ პრესსამსახურის მიერ გავრცელებულ განცხადებაში.

„ნაპოლი“– „ატალანტას“ მატჩში ქართველი თავდამსხმელის შემცვლელი შერჩეულია – ინფორმაციას Sky Sport Italia აქვეყნებს.

„შაბათს, 30 მარტს, 15:30 საათზე, „სტადიო მარადონაზე“ „ნაპოლი“ „ატალანტას“ უმასპინძლებს. ეს, შესაძლოა, გადამწყვეტი დღე იყოს გუნდისთვის, რომელიც ჩემპიონთა ლიგაზე მოსახვედრად იბრძვის. ხვიჩა ბარძაყის კუნთის ტრავმის გამო „ატალანტასთან“ თამაშს გამოტოვებს – გუნდის ექიმებმა შემდგომი გართულებების თავიდან ასაცილებლად ფეხბურთელს თამაშის უფლება არ მისცეს.

მთავარმა მწვრთნელმა, ფრანჩესკო კალცონამ კი კვარაცხელიას შემცვლელზე ფიქრი უნდა დაიწყოს, მას ​რასპადორისა და ლინდსტრიომს შორის მოუწევს არჩევანის გაკეთება – ამ ეტაპზე ბერგამოელებთან თამაშის მეტი შანსი ჯაკომო რასპადორის აქვს“, – ამტკიცებს Sky Sport Italia.

საქართველომ საბერძნეთი პენალტების სერიაში დაამარცხა და ევროპის ჩემპიონატზე ითამაშებს.

საქართველოს ფეხბურთის ფედერაცია “უეფასგან” პრიზის სახით 9.25 მილიონ ევროს მიიღებს.

აქვე გეტყვით, რომ ევროპის ჩემპიონატზე ჯგუფურ ეტაპზე თითოეული გამარჯვება 1 მილიონ ევროდ ფასდება.

საქართველოს მეტოქეები ჯგუფში პორტუგალია, ჩეხეთი და თურქეთი იქნებიან

გიორგი მამარდაშვილი მსოფლიოს ყველაზე ძვირადღირებულ მეკარეებს შორის მე-7 ადგილზეა. ვებგვერდ Transfermarkt-ის მონაცემებით, მამარდაშვილის სატრანსფერო ღირებულება 5 მილიონი ევროთი გაიზარდა და 35 მილიონი ევრო შეადგინა.

„ვალენსიისა“ და საქართველოს ნაკრების მეკარე მე-7 ადგილს იყოფს იტალიელ გულიელმო ვიკარიოსთან („ტოტენჰემი“) და ესპანელ დავიდ რაიასთან („არსენალი“).

რეიტინგის სათავეში „პორტუს“ 24 წლის მეკარე დიოგო კოშტაა (45 მილიონი ევრო), პირველი ათეული კი ასე გამოიყურება:

1. დიოგო კოშტა („პორტუ“) - €45 მილიონი
2. ჯანლუიჯი დონარუმა (პსჟ) - €40 მილიონი
3. გრეგორ კობელი („დორტმუნდი“) - €40 მილიონი
4. ედერსონი („მანჩესტერ სითი“) - €40 მილიონი
5. ანდრე ონანა („მანჩესტერ იუნაიტედი“) - €40 მილიონი
6. მაიკ მენიო („მილანი“) - €40 მილიონი
7. გიორგი მამარდაშვილი („ვალენსია“) - €35 მილიონი
8. გულიელმო ვიკარიო („ტოტენჰემი“) - €35 მილიონი
9. დავიდ რაია („არსენალი“) - €35 მილიონი
10. ალისონი („ლივერპული“) - €32 მილიონი

საბერძნეთის ეროვნული საფეხბურთო ნაკრების საქართველოს ნაკრებთან გუშინდელი მარცხის შემდეგ, ბერძენი გულშემატკივრები უკმაყოფილებას ვერ მალავენ და საბერძნეთის საფეხბურთო ნაკრების ოფიციალურ "ფეისბუქ" გვერდზე, მთავარი მწვრთნელის, გუსტავო პოიეტის გადადგომას ითხოვენ.

"წაგება საწყენია, რადგან ჩვენ ყოველ დღე არ გვექნება იმის შანსი, რომ "ევრო 2024-ზე" წავიდეთ. მოვიდა დრო, შევცვალოთ მთავარი მწვრთნელი და გუნდის შენება ნულიდან დავიწყოთ";

"მატჩი მწვრთნელმა წააგო, თამაში პენალტების სერიამდე არ უნდა მისულიყო. მას უფრო აზარტული ფეხბურთი უნდა ეთამაშა";

"ნახვამდის პოიეტ, გუშინდელი შენი ფიასკო წასვლის დოკუმენტზე ხელმოწერაა";

"დამნაშავე მხოლოდ მწვრთნელია, მან ფეხბურთელები აიძულა 90 წუთის განმავლობაში არაფერი ეკეთებინათ. ის უნდა წავიდეს",- წერენ საბერძნეთის ნაკრების გულშემატკივრები

ახლო მომავალში გვეცოდინება და საჯაროდ განვაცხადებთ, რა ფორმით მოხდება ჩვენი გულშემატკივრისთვის ბილეთების გაცემა, - ამის შესახებ ფეხბურთის ფედერაციის პრეზიდენტმა, ლევან კობიაშვილმა "რუსთავი 2-ის" ეთერში "ევრო 2024"-ის მატჩზე საუბრისას განაცხადა.

მისი თქმით, "UEFA-სთან" კომუნიკაცია დაწყებულია და დეტალები უახლოეს მომავალში გავრცელდება.

"თამაშის შემდეგ უამრავი მესიჯი, ზარი და ინფორმაცია შემოდიოდა. "UEFA-სთან" კომუნიკაცია დაწყებული გვაქვს და ახლო მომავალში გვეცოდინება და ამას, საჯაროდ განვაცხადებთ, თუ რა ფორმით მოხდება ჩვენი გულშემატკივრისთვის ბილეთების გაცემა, რა პლატფორმებზე იქნება ამის საშუალება. სავარაუდოდ, თავად UEFA აორგანიზებს და ალბათ, ბილეთებს თავიანთ პლატფორმებზე გაყიდიან. დღეს გამიჭირდება რამე კონკრეტული გითხრათ, თუმცა შემიძლია ვთქვა ის, რომ ყველა თამაშზე როგორც ერთი, ისე მეორე გუნდის გულშემატკივრებს, თანაბრად უნაწილდება ბილეთები. რაღაც ნაწილი საჯარო სივრცეში გადის, სავარაუდოდ, გაიყიდება, რაღაც ნაწილს თავად UEFA იტოვებს თავიანთი პარტნიორებისა და სპონსორებისთვის. ამ ყველაფერზე ფეხბურთის ფედერაცია უახლოეს მომავალში გააკეთებს ოფიციალურ განცხადებას და ნებისმიერ გულშემატკივარს ექნება სრული ინფორმაცია,"- აცხადებს ლევან კობიაშვილი.

ისტორიაში პირველად, საქართველოს ეროვნული საფეხბურთო ნაკრები ევროპის ჩემპიონატზე ითამაშებს. 26 მარტს, საქართველოს ნაკრებმა ევრო 2024-ის საკვალიფიკაციო ეტაპის ფინალურ შეხვედრაში საბერძნეთის ეროვნულ ნაკრებს სძლია. ანგარიშის ბედი პენალტების სერიაში გადაწყდა და საქართველოს სასარგებლოდ - 4:2 დასრულდა. ისტორიული შეხვედრა თბილისში, "დინამო არენაზე" გაიმართა.

საქართველოს ნაკრები ევროპის ჩემპიონატზე პირველ თამაშს დორტმუნდში, თურქეთის ნაკრების წინააღმდეგ, 18 ივნისს ჩაატარებს.

საქართველოს ეროვნული ბანკი, საქართველოს ეროვნული ნაკრების ისტორიული გამარჯვებისა და ევროპის 2024 წლის ჩემპიონატზე თამაშის აღსანიშნავად, ევრო 2024-ის საკოლექციო მონეტას გამოუშვებს

"შესაბამისი გადაწყვეტილება საქართველოს ეროვნული ბანკის საბჭომ მიიღო. საკოლექციო მონეტის დიზაინზე სებ-ი საქართველოს ფეხბურთის ფედერაციასთან ერთად იმუშავებს," - წერია განცხადებაში.

მანამდე 2022 წელს სებ-მა საქართველოში ევრობასკეტის მასპინძლობასთან დაკავშირებით "ევრობასკეტი 2022"-ის თემაზე საკოლექციო დანიშნულების 5 ლარის ნომინალის ვერცხლის მონეტა გამოუშვა.

შეგახსენებთ, რომ საქართველოს ნაკრებმა ევროპის საკვალიფიკაციო ეტაპის ფინალურ თამაშში საბერძნეთს, პენალტების სერიაში 4:2 მოუგო. საქართველო ევროპა 2024-ში ითამაშებს.

30 წლის წინ დაიწყო ჩვენი ეროვნული ნაკრების ისტორია და 30 წლის თავზე ჩვენ პირველად მოვახერხეთ, შევძელით და გავედით უმაღლესი რანგის ტურნირზე - ევროპის ჩემპიონატზე, რაც არის, რა თქმა უნდა, განსაკუთრებული სიამაყის საგანი, -  ამის შესახებ საქართველოს პრემიერ-მინისტრმა ირაკლი კობახიძემ მთავრობის სხდომაზე განაცხადა.

პრემიერმა ყველა მიულოცა ისტორიული გამარჯვება და წარმატება.

„დღეს გვაქვს განსაკუთრებული, ემოციური დღე და შესაბამისად, განსაკუთრებული სხდომა. მინდა ყველას მოგილოცოთ გუშინდელი ისტორიული გამარჯვება, ისტორიული წარმატება. ყველას, ჩვენს თანამოქალაქეებს, ჩვენს ემიგრანტებს და რაც მთავარია, ჩვენს ფეხბურთელებს ვულოცავ, ბუნებრივია, ამ გამარჯვებას. გუშინ ნამდვილად ისტორია დაიწერა, ეს თამამად შეიძლება ითქვას. 30 წლის წინ დაიწყო ჩვენი ეროვნული ნაკრების ისტორია და 30 წლის თავზე ჩვენ პირველად მოვახერხეთ, შევძელით და გავედით უმაღლესი რანგის ტურნირზე - ევროპის ჩემპიონატზე, რაც არის, რა თქმა უნდა, განსაკუთრებული სიამაყის საგანი. სიტყვებით შეუძლებელია ამ ბედნიერებისა და სიამაყის განცდის აღწერა, რაც გუშინდელმა დღემ მოგვანიჭა და რამაც მთელი ქვეყანა გააერთიანა. ესეც ძალიან თამამად შეიძლება ითქვას.

მინდა მადლობა გადავუხადო, პირველ რიგში, რა თქმა უნდა, ისევ და ისევ ფეხბურთელებს, ჩვენი ეროვნული ნაკრების წევრებს, რომლებმაც მართლა სული და გული ჩადეს გუშინდელ გამარჯვებაში, ასევე -  რა თქმა უნდა, სამწვრთნელო შტაბს ვილი სანიოლის, ჩვენი საამაყო ფრანგი მწვრთნელის ხელმძღვანელობით და ასევე განსაკუთრებული მადლობა ეკუთვნით ფეხბურთის ფედერაციის ხელმძღვანელებს, პრეზიდენტს, გენერალურ მდივანს, ვიცე პრეზიდენტებს, თითოეულ მათგანს განსაკუთრებული მადლობა. წლების მანძილზე იქმნებოდა ის წარმატება, რომელსაც ჩვენ საბოლოო ჯამში გუშინ მივაღწიეთ. ასევე მინდა მივულოცო ეს ისტორიული გამარჯვება ჩვენს ვეტერან ფეხბურთელებს, მათ ათწლეულების მანძილზე შექმნეს ეს გამარჯვება, ჩვენს ვეტერანებს ვულოცავ, 13 მაისის გმირებს, ჩვენს ვეტერან ფეხბურთელებს განსაკუთრებით მინდა მივულოცო. მინდა მივულოცო, რა თქმა უნდა, ნაკრების ყველა თაობის ფეხბურთელებს, თითოეული მათგანის წვლილი ამ გამარჯვებაში არის განსაკუთრებული. მათ მოიტანეს ეს გამარჯვება, რომელიც ჩვენ გუშინ შევქმენით და რომელიც მოგვიტანეს ჩვენმა ბიჭებმა“, -  განაცხადა პრემიერმა.

გერმანიაში ევროპის ჩემპიონატი 14 ივნისს დაიწყება, საქართველოს ნაკრები F ჯგუფში თურქეთთან, ჩეხეთსა და პორტუგალიასთან ერთად ითამაშებს.

„ჯვაროსნების“ კალენდარი ევროპის ჩემპიონატზე ასეთია:

18 ივნისი, დორტმუნდი, „სიგნალ იდუნა პარკი“ | თურქეთი – საქართველო

22 ივნისი, ჰამბურგი, „ვოლკსპარშტადიონი“ | საქართველო – ჩეხეთი

26 ივნისი, გელზენკირხენი, „არენა აუფ შალკე“ | საქართველო-პორტუგალია

მსოფლიო რეიტინგის ლიდერმა სანდრო ბაზაძემ ოლიმპიური ლიცენზია მიიღო. იგი ხმლით ფარიკაობაში საქართველოს ზედიზედ მესამედ წარადგენს ოლიმპიურ თამაშებზე, ამჯერად უკვე პარიზი 2024-ზე. ოლიმპიადის სალიცენზიო ტურნირების დასრულების შემდეგ, ქართველი მოფარიკავე საერთაშორისო რეიტინგს 242 ქულით კვლავ დამაჯერებლად ლიდერობს.

სანდრო ბაზაძე არის მსოფლიო ჩემპიონატების ვერცხლის და ბრინჯაოსმედალოსანი, ევროპული თამაშების ჩემპიონი, ევროპის ორგზის ჩემპიონი და სამი ბრინჯაოს მედლის, აგრეთვე მსოფლიო თასის მრავალგზის მფლობელი.

2016 წელს, რიო დე ჟანეიროს ოლიმპიადაზე სანდრო ბაზაძემ მე-13 ადგილი დაიკავა, მომდევნო თამაშებზე, ტოკიოში კი ნახევარფინალში დამარცხდა და მე-4 ადგილი ერგო.

უკრაინის პრეზიდენტი ვოლოდიმირ ზელენსკი უკრაინის ეროვნულ საფეხბურთო ნაკრებს გამარჯვებას ულოცავს.

დღეს უკრაინამ საკვალიფიკაციო ეტაპის ფინალურ თამაშში ისლანდია ანგარიშით 2:1 დაამარცხა და ევროპის ჩემპიონატზე გავიდა.

"მადლობა ბიჭებო! მადლობა ნაკრებს!

მთელი ქვეყნისთვის მნიშვნელოვანი ემოციებისთვის. უმნიშვნელოვანესი გამარჯვებისთვის და ევროპაზე გასვლისთვის.

იმისთვის, რომ კიდევ ერთხელ დაამტკიცეთ: როცა უკრაინელებს უჭირთ, მაგრამ არ ნებდებიან და ბრძოლას აგრძელებენ, აუცილებლად იმარჯვებენ.

იმ დროს, რაცა ყოველდღე ჩვენს განადგურებას ცდილობენ, ჩვენ ყოველდღე ვამტკიცებთ: უკრაინელები არიან და იქნებიან! უკრაინა არის და იქნება ! მადლობა გამარჯვებისთვის! დიდება უკრაინას!", - წერს ვოლოდიმირ ზელენსკი. 

საქართველოს ეროვნული საფეხბურთო ნაკრების მთავარმა მწვრთნელმა, ვილი სანიოლმა საბერძნეთთან ევრო 2024-ის პლეი ოფის ფინალის მოგების შემდეგ სიხარული ვერ დამალა, რომ „ჯვაროსნები“ ისტორიაში პირველად ევროპის ჩემპიონატზე გაიყვანა.

„ბევრი ფიქრობდა, რომ მთავარი მწვრთნელის თანამდებობიდან უნდა წავსულიყავი, არც ახლა ვფიქრობ წასვლაზე, რადგან კარგი ხალხში, ქვეყანაში და პროფესიონალებში მოვხდი, აქ მუშაობა მიხარია.

რა შეგრძნება მაქვს, რომ ასეთი შედეგს მივაღწიეთ? სასიხარულოა, როცა შედეგს იღებ, მაგრამ გჭირდება დიდი მოთმინება და იმედი. საქმე ხან გამოდის, ხან – არა, მოთმინება ამიტომაა საჭირო.

მწვრთნელის წარმატება ფეხბურთელის მიღწევისგან განსხვავებულია. ფეხბურთელი პასუხს საკუთარ თამაშზე აგებს, მწვრთნელი კი – გუნდის შედეგზე. ეს სულ სხვა შეგრძნებაა, რაც დიდ შრომას მოაქვს.

პენალტებზე ბევრი ვივარჯიშეთ. როდესაც სერია იწყებოდა, უნდა შეგვერჩია, ვინ დაარტყამდა, ფეხბურთელებს გავესაუბრე და პირველი პენალტის შესრულება ქოჩორაშვილმა ისურვა. ის დიდი ხანია არაა, რაც ნაკრებში თამაშობს, მაგრამ ისეთი შეგრძნება მაქვს, თითქოს წლებია, გუნდის წევრია. იგივე დვალი, რომელმაც ისე კარგად შეასრულა პენალტი. არავის გამოყოფა არ მსურს, დღეს ყველამ ფანტასტიკურად ითამაშა“, – განაცხადა ვილი სანიოლმა.

„ასეთია გრძნობა, როცა პირველად ხვდები მთავარ ტურნირზე“, - ამ სიტყვებით ულოცავს UEFA საქართველოს ნაკრებს, ევროპის საფეხბურთო ჩემპიონატში გასვლას და გამარჯვებული ქართველი ფეხბურთელების ემოციურ ფოტოებს აქვეყნებს.

საქართველოს ნაკრებმა საბერძნეთის ნაკრები დაამარცხა და პირველად ისტორიაში ევროპის ჩემპიონატზე გავიდა.