ქალაქ დნიპროში, სამართალდამცველებმა, შვილის გაყიდვის მცდელობის დროს, უკრაინელი ქალი დააკავეს. პროკურატურის ინფორმაციით, 19 წლის დედა საკუთარი ორი წლის შვილის გაყიდვას დაახლოებით 25 ათას დოლარად ცდილობდა.

ახალგაზრდა ქალის აყვანა უშუალოდ ბავშვის გაყიდვის მცდელობის დროს მოხდა. დაკავებულს ბრალი ოფიციალურად არასრულწლოვანით ვაჭრობაში წაუყენეს. ეს მუხლი, ქონების კონფისკაციასთან ერთად, 15 წლამდე პატიმრობას ითვალისწინებს.

ჰარი სტაილსის სტალკერი სასამართლომ დამნაშავედ ცნო. მირა კარვალიოს ვარსკვლავის ადევნებისთვის 14 კვირა ადევნებისთვის თავისუფლების აღკვეთა შეეფარდა. მას შემაკავებელი ორდერიც გამოუწერეს, რითაც 10 წლის განმავლობაში მომღერლის კონცერტზე დასწრება და სტაილსთან პირდაპირი ან არაპირდაპირი გზით დაკავშირება აეკრძალა.

მირამ მომღერალს 1 თვეზე ნაკლებ დროში 8000-ზე მეტი წერილი გაუგზავნა, წერილების ნაწილი მან თავისი ხელით დაწერა და მომღერლის მისამართზე მიიტანა, ნაწილი კი ინტერნეტით შეუკვეთა და სტაილსის სახლში გააგზავნა.

როგორც ირკვევა, ბრაზილიელი მირა ჩრდილოეთ ლონდონის ჰოსტელში დეკემბრიდან რჩება, რის შესახებაც მის ოჯახს წარმოდგენა არ ჰქონდა. განაჩენის მოხდის შემდეგ კარვალიოს ამ ტერიტორიაზე გაჩერება აღარ შეეძლება. ასევე, მან ჰარის 134 ფუნტი უნდა გადაუხადოს.

ეს პირველი შემთხვევა არ არის, როდესაც ჰარის აედევნნენ. მაგალითად, 2019 წელს სტაილსის სტალკერი ახალგაზრდა კაცი თვეების განმავლობაში მომღერლის სახლთან იყო დაბანაკებული და იქ ცხოვრობდა. როდესაც ვარსკვლავმა ის პირველად შენიშნა, ჩათვალა, რომ დახმარება სჭირდებოდა და საკვებისა და სასტუმროსთვის თანხა შესთავაზა, დროთა განმავლობაში კი მან კაცის შემჩნევა სახლის მიმდებარე ტერიტორიაზე ხშირად დაიწყო. კვირაში 3-4 ჯერ სტაილსი პაბში მიდიოდა ხოლმე, სადაც კაცი ჰარის მისვლიდან რამდენიმე წუთში ჩნდებოდა. მომღერლის თქმით, თავს უსაფრთხოდ არ გრძნობდა, რის გამოც ღამის დარაჯის დაქირავება დასჭირდა. სასამართლომ კაცი დამნაშავედ ცნო. 

შვედურმა ალკოჰოლურმა ბრენდმა Absolut Vodka-მ, Pasta Bag-ის დიზაინერ ნიკოლას ბენტელესთან ერთად, შექმნა ჩანთა Absolut Espresso Martini, რომელსაც კოქტეილის ბოკალის ფორმა აქვს. აქსესუარი ზუსტად ისე გამოიყურება, როგორც პირამდე გავსებული ესპრესსო მარტინის ჭიქა - ყავის მარცვლებით. ჩანთა ტყავის, ქრომირებული ფოლადისა და მტკიცე ტრიტანის პლასტმასისგან არის დამზადებული. აქსესუარი შეზღუდული რაოდენობით გამოუშვეს და ის უკვე გაყიდვაშია, მისი ფასი 200 დოლარამდეა.

ავიაკომპანიამ Air India საკუთარ ბორტგამცილებლებს ჭაღარა თმა და სიმელოტე აუკრძალა. როგორც ბრიტანული მედია წერს, ავიაკომპანიამ ახალი მკაცრი წესების შემოღება გადაწყვიტა - არ შეიძლება, Air India-ს თანამშრომლებს ჰქონდეთ ჭაღარა თმა, იყვნენ მელოტები, არ უნდა ატარონ ყოველდღიური ტანსაცმელი მაშინაც კი, თუ ისინი პერსონალის კი არა, მგზავრების რანგში მიფრინავენ - ამ ახალი მოთხოვნების სიას გამოცემა აქვეყნებს. ამ მოთხოვნების დასაცავად ავიაკომპანია საკუთარ თანამშრომლებს ურჩევს, რეგულარულად შეიღებონ თმა ნატურალურ ფერზე (მოდური ფერები და ინით შეღებვაც იკრძალება). იმ თანამშრომლებს კი, რომლებსაც თმა ნელ-ნელა უთხელდებათ, ხშირ-ხშირად თავის გადაპარსვა მოუწევთ.

სპეციალისტებმა ანტიბაქტერიული ეფექტის მქონე ბამბა შეიმუშავეს. ამისთვის მათ ქსოვილი დაფარეს ლითონის ოქსიდის ნანონაწილაკებით, რომლებიც თრგუნავენ ბაქტერიებისა და სხვა რესიზისტენტული მიკროორგანიზმების აქტივობას. სწავლულებმა დამატებითი დაცვისთვის ულტრაბგერითი დამუშავების ტექნოლოგია გამოიყენეს, რამაც შესაძლებელი გახადა ლითონის ნაწილაკების თანაბრად განაწილება. მასალის საბოლოო ხარისხი და გარეგნობა საერთოდ არ განსხვავდება ჩვეულებრივი ბამბისგან. მისი დამცავი საფარი სარეცხ მანქანაში, სულ ცოტა, 20 გარეცხვას მაინც უძლებს. სამთვიანი ცდები მკვლევარებმა ვიეტნამში ჩაატარეს, სადაც მაღალი ტენიანობა და ტემპერატურაა. ასეთი გარემო კი ხელს უწყობს პათოგენების გამრავლებას. ცდების შედეგ აღმოაჩინეს, რომ ახალ ქსოვილზე მიკროორგანიზმების რაოდენობა 30-100-ჯერ უფრო ნაკლები იყო, ვიდრე ჩვეულებრივ ბამბაზე.

ინდონეზიის მცხოვრებლები მსოფლიოში ყველაზე გულუხვები არიან, - ასეთი დასკვნა არაკომერციული ორგანიზაცია Charities Aid Foundation-ის სპეციალისტებმა დადეს. კვლევისას, მსოფლიოს 119 ქვეყნის მოსახლეობა ქველმოქმედებაში მონაწილეობის დონით შეაფასეს: დაეხმარნენ თუ არა ისინი ბოლო თვის განმავლობაში უცხოელს, რომელსაც დახმარება სჭირდებოდა, გაიღეს თუ არა თანხა, ყოფილან თუ არა მოხალისეები რომელიმე ორგანიზაციაში და სხვა. რეიტინგის ლიდერი ქვეყნის რესპონდენტთა 84%-მა განაცხადა, რომ გაუღიათ თანხა საქველმოქმედო ორგანიზაციებისთვის. ალბათ, ეს იმით იხსნება, რომ ინდონეზიის მოსახლეობა ძალიან რელიგიურია და მორწმუნეებს სიკეთის კეთებისკენ მოუწოდებენ. გულუხვი ქვეყნების სიაში მეორე ადგილზე აღმოჩნდა კენია. მიუხევადად პანდემიითა და ინფლაციით გამოწვეული სიძნელეებისა, კენიელები მზად არიან, გაჭირვებაში ჩავარდნილ ადამიანს დაეხმარონ. ამ შემთხვევაშიც, ძირითადი მიზეზი რელიგიაა. ლიდერთა სამეულშია აშშ, ხოლო მეოთხე-მეხუთე ადგილებზე - ავსტრალია და ახალი ზელანდია.

კენიაში, ერთ-ერთმა ადგილობრივმა კომპანიამ, რომელსაც ორი ძმა ხელმძღვანელობს, ძველი გაზეთებისგან ფანქრების წარმოება დაიწყო. საწარმოს თანამშრომლები გაზეთებს საჭირო სიგრძეზე ჭრიან, შიგნით გულებს დებენ და ახვევენ. იმ დროს, როცა მთელ მსოფლიოში ბეჭდური მედიის მკითხველთა რაოდენობა უსწრაფესად მცირდება, ამ აფრიკულ ქვეყანაში, პირიქით ხდება - მათი რაოდენობა იზრდება, რადგან მოსახლეობის 40%-ს არ აქვს წვდომა ინტერნეტსა და ტელევიზიაზე, ამიტომ ახალ ამბებს ისინი გაზეთებიდან იგებენ. ამ მიზეზით იზრდება გაზეთების რაოდენობაც, რომელიც მერე ნაგავსაყრელზე ხვდება. ძმებმა ომარებმა ამ ნაგვის შემცირება გადაწყვიტეს, შემოსავლის წყაროც გაიჩინეს და ქველმოქმედებასაც ეწევიან. გაზეთის ორი გვერდიდან სამი ფანქარი გამოდის, თუმცა საბოლოო სახემდე ის დამუშავების ცხრა ეტაპს გადის. მზა პროდუქციის ყოველი პარტიიდან ფანქრების ნაწილი ბავშვებს ურიგდებათ, ღარიბი რაიონებიდან.

საჭმლის მომნელებელი ტრაქტის კიბოს განვითარების რისკის შესამცირებლად, დღეში ერთი მწვანე ბაბანის მირთმევაც საკმარისია, - ასეთ დასკვნებს აკეთებენ სწავლულები ნიუკასლისა და ლიდსის უნივერსიტეტებიდან. მკვახე ბანანი, სიმინდისა და შვრიის ფანტელი, მოხარშული ცივი კარტოფილი, მაკარონი, ბრინჯი, ცეხვილი პური, პარკოსნები რეზისტენტულ სახამებელს შეიცავენ. ასეთი სახამებელი არ იწოვება წვრილ ნაწლავში და მსხვილ ნაწლავამდე აღწევს, სადაც სასარგებლო ბაქტერიებისთვის საკვებ ნიადაგად გვევლინება. სახამებლის დამცავი ეფექტი საერთაშორისო კვლევების ფარგლებში გამოვლინდა. 1000 პაციენტზე ჩატარებულმა ექსპერიმენტებმა, რომლის დროსაც 30 გრამ რეზისტენტული სახამებლის ფხვნილს იყენებდნენ (ერთ მწვანე ბანანში არსებული რაოდენობა). მრავალწლიანი დაკვირვების შემდეგ აღმოჩნდა, რომ სახამებელი 60%-ით ამცირებდა საჭმლის მომნელებელი ტრაქტის ზედა ნაწლის - საყლაპავის, კუჭის, ნაღვლისგამოყოფი გზების, თორმეგოჯა ნაწლავის ონკოლოგიური დაავადებების განვითარების რისკს. აღსანიშნავია ისიც, რომ ეს ეფექტი სახამებლის მიღების შეწყვეტიდან კიდევ ათი წლის განმავლობაში გრძელდებოდა.

ნისლიან ალბიონზე, ქალაქ ბრისტოლში მცხოვრებმა მამაკაცმა საკუთარი ფსიქოთერაპევტის რჩევა გაითვალისწინა და სახლში 300 ობობა-ტარანტული მოაშენა. მედიკოსებმა აარონ ფინიკს ბიპოლარული აშლილობის დიაგნოზი დაუსვეს და ფსიქიკური ჯანმრთელობისთვის რაიმე გასართობის მოძიება ურჩიეს. ამჟამად ბრიტანელის ობობების კოლექცია უკვე 300 ეგზემპლარს ითვლის. აარონს ყველაზე მეტად მექსიკური ტარანტული უყვარს, რომლის ღირებულებაც 160 გირვანქა სტერლინგია. მამაკაცს მათზე საათობით დაკვირვება სიამოვნებას ანიჭებს და საოცარ ეფექტს ახდენს. ის მთელ თავისუფალ დროს მათთან ატარებს.

შვედმა სწავლულებმა მოწევისგან თავის დასაღწევად საკმაოდ ექსტრავაგანტული მეთოდი მოიფიქრეს. ნიკოტინის პლასტირების, საღეჭი რეზინებისა თუ ელექტრონული სიგარეტის ნაცვლად, ისინი ნიკოტინური პრეზერვატივების გამოყენებას გვთავაზობენ. მკვლევარები ვარაუდობენ, რომ ეს არა მხოლოდ უარს გათქმევნებთ მავნე ჩვევაზე, არამედ, დაგიცავთ სქესობრივი გზით გადამდები დაავადებებისა და დაუგეგმავი ორსულობისგან. სიახლის ავტორების თქმით, პრეზერვატივი ორგანიზმს ნიკოტინის გარკვეულ დოზას მიაწვდის. აღსანიშნავია, რომ კომპანია Pharmacia Latexx Aktiebolaget-თვის, რომელმაც სიახლე დაამზადა, ეს ექსპერიმენტი პირველი არ არის - ადრე ისინი პრეზერვატივებს ყავის მოყვარულებისთვისაც უშვებდნენ, კოფეინით.

კანადის ქალაქ ვინიპეგის ხელისუფლება ახალი აქტის მიღებას აპირებს, რომლის მიხედვითაც, ქალაქის მცხოვრებლებს საზოგადოებრივი ტრანსპორტით მგზავრობისას სიმღერა აეკრძალებათ. კანონდამღვევი ფულადი ჯარიმით - 100 დოლარით დაისჯება. ახალი აქტი მგზავრებს უკრძალავს სიმღერას, დაკვრას მუსიკალურ ინსტრუმენტებზე, ან რამე წარმოდგენის შეთავაზებას ნებისმიერ საზოგადოებრივ ტრანსპორტში. ქალაქის მერის თქმით, აკრძალვის ძირითადი მიზანი მგზავრების დაცვაა ზედმეტი ხმაურისგან. ადამიანებს აქვთ უფლება, საზოგადოებრივი ტრანსპორტით სიმშიდესა და სიჩუმეში იმგზავრონ.

კბილის ყველა პასტა პრაქტიკულად ერთნაირია და არ შეუძლია კბილები დაიცვას მაღალი მგრძნობელობის ან დაშლისგან, - ასეთ დასკვნამდე მივიდნენ სპეციალისტები შვეიცარიისა და ბრაზილიის უნივერსიტეტებიდან. სწავლულთა საერთაშორისო ჯგუფმა გამოსაკვლევად აიღო - საკონტროლოდ ერთი „ჩვეულებრივი“ და რამდენიმე სხვადასხვა სახეობის პასტა, რომლებიც ეროზიისგან და კბილების მგრძნობელობისგან დაცვას გვპირდებიან. ექსპერიმენტებისას, წმენდის ხუთი ციკლი ჩატარდა ყველაზე უფრო პოპულარული კბილის პასტებით ბრაზილიასა და ევროპაში. აღმოჩნდა, რომ მათგან არცერთი არ იცავს კბილებს კარიესისგან და არ შეუძლიათშეაჩერონ კბილის ემალის დაკარგვა. სპეციალისტები გვირჩევენ, სამი ძირითადი წესი დავიცვათ, ემალის გაცვეთა და სხვა პრობლემები რომ თავიდან ავირიდოთ -  ეს არის კვების სწორი რეჟიმი, პირის ღრუს კარგი ჰიგიენა და სტომატოლოგთან რეგულარული ვიზიტი.