შავი ზღვა აღარ არის ის, რაც გვთიშავდა დანარჩენ თანამედროვე მსოფლიოსგან, ცივილიზებული სამყაროსგან, შავი ზღვა არის დღეს ის, რაც გვაერთიანებს და გვაძლევს იმედს, რომ ჩვენ მალე ვიქნებით ერთი დიდი ოჯახი ყველა თავისი იდენტობით, თავისი ენით, თავისი კულტურით და ყველა თავისი თავისუფლებით და ეს არის ევროპის მთავარი ნიშანი,- ასე მიმართა საქართველოს პრეზიდენტმა სალომე ზურაბიშვილმა ორბელიანების სასახლეში მიწვეულ თბილისის თანამედროვე ხელოვნების ბაზრობის (TAF) სტუმრებს.

პრეზიდენტის თქმით, ისეთი ღონისძიებები, როგორიც არის თანამედროვე ხელოვნების ბაზრობა აჩენს რწმენას, რომ საქართველო არ არის ჩამოშორებული ევროპას.

„ჩვენ ბევრს ვლაპარაკობთ ევროპაზე და საქართველოს ევროპულ მომავალზე და არ დავიღლებით, მაგრამ საქართველოს ევროპული მომავალი, ასევე, არის, როდესაც ევროპა აქ არის და სწორედ თანამედროვე ხელოვნების ბაზრობა (TAF) არის ის მომენტი და ის ადგილი, სადაც ევროპა ჩვენთან არის და სადაც ჩანს, რომ ის, რაც ხდება თბილისში და ასევე ხდება ნებისმიერ ევროპულ ქალაქში, არის ძალიან ახლოს, ეს არის ის თანამედროვეობა, რომელიც გვაძლევს იმის ღრმა რწმენას, რომ ჩვენ არ ვართ ჩამოშორებული სადღაც შორს. შავი ზღვა აღარ არის ის, რაც გვთიშავდა დანარჩენ თანამედროვე მსოფლიოსგან, ცივილიზებული სამყაროსგან, შავი ზღვა არის დღეს ის, რაც გვაერთიანებს და გვაძლევს იმედს, რომ ჩვენ მალე ვიქნებით ერთი დიდი ოჯახი ყველა თავისი იდენტობით, თავისი ენით, ყველა თავისი კულტურით და ყველა თავისი თავისუფლებით და ეს არის ევროპის მთავარი ნიშანი“, - განაცხადა პრეზიდენტმა.

ცნობისთვის, ორბელიანების სასახლეში საქართველოს პრეზიდენტი მასპინძლობს თბილისის თანამედროვე ხელოვნების ბაზრობის (TAF) სტუმრებს, რომელიც „ექსპო ჯორჯიას“ საგამოფენო სივრცეში 11-13 აპრილს იმართება.

„ქართული ოცნების“ თავმჯდომარე ირაკლი ღარიბაშვილი, პარტიის აღმასრულებელი მდივანი მამუკა მდინარაძე და რეგიონული მდივანი დიმიტრი სამხარაძე ამბროლაურის, ონის, ცაგერისა და ლენტეხის ადგილობრივი ორგანიზაციების ხელმძღვანელებსა და პარტიულ აქტივს შეხვდნენ.

ამბროლაურში გამართულ შეხვედრას ესწრებოდნენ საპარლამენტო უმრავლესობის წევრები: გოჩა ენუქიძე, გოდერძი ჩანქსელიანი, ბექა დავითულიანი, გია ბენაშვილი, რაჭა-ლეჩხუმ-ქვემო სვანეთის მხარეში სახელმწიფო რწმუნებული პარმენ მარგველიძე.

როგორც შეხვედრაზე პარტიის ლიდერებმა განაცხადეს, სრულად პროპორციული არჩევნები პირველად იმართება, ამიტომ საჭიროა მაქსიმალური მობილიზება საკონსტიტუციო უმრავლესობის მისაღებად.

„დღეს ძალიან კარგი შეხვედრა გაიმართა, შევხვდი პარტიის რაჭის აქტივს, ვისაუბრეთ მოახლოებულ არჩევნებზე. ძალიან მაგარი განწყობაა ამ რეგიონში. ჩვენი მთავარი გზავნილი მოგეხსენებათ ყველას, რომ არის შემდეგი – პირველად იმართება სრულად პროპორციული არჩევნები, ამიტომ საჭიროა მაქსიმალური მობილიზება. სწორედ ამ საკითხებზე იყო საუბარი. ჩვენ გვაქვს გაცხადებული მიზანი. გვინდა მაქსიმალური შედეგის აღება, გვაქვს ამბიცია, ავიღოთ საკონსტიტუციო უმრავლესობა. ასევე საუბარი გვქონდა სხვა მიმდინარე თემებზე. ვფიქრობ, ძალიან მაგარი შედეგი დაიდება ამ რეგიონში“, – განაცხადა ირაკლი ღარიბაშვილმა.

პარტიის აღმასრულებელი მდივნის თქმით, შეხვედრაზე საუბარი იყო ყველა მიმდინარე თემაზე, მიმდინარე პოლიტიკურ საკითხებსა და ქვეყნის გამოწვევებზე.

„ჩვენი შეხვედრები გრძელდება, პოზიტიური ხასიათის რომ არის, ეს ერთი, მაგრამ ჩვენთვისაც განსაკუთრებული სტიმულია. მოგეხსენებათ, რაჭველ ხალხზე დინჯი და კარგი ხალხი იშვიათია და დღესაც ასეთივე შეხვედრა იყო. ჩვენ ვისაუბრეთ ყველა მიმდინარე თემაზე, მიმდინარე პოლიტიკურ საკითხებზე, ქვეყნის გამოწვევებზე. რაჭველებიც, ისევე, როგორც სხვა კუთხის და სხვა მხარის წარმომადგენლები, ძალიან ადეკვატურად აღიქვამენ პრობლემებსაც, გამოწვევებსაც, პოზიტივებსაც, რაც ქვეყანაში ხდება და ამიტომ, ბუნებრივია, ძალიან კარგი შეხვედრა იყო“, – აღნიშნა მამუკა მდინარაძემ.

„ქართული ოცნების“ თავმჯდომარისა და პარტიის ლიდერების შეხვედრები რეგიონებში 2 მარტს დაიწყო. რაჭა-ლეჩხუმ-ქვემო სვანეთის გარდა, შეხვედრები გაიმართა აჭარაში, სამეგრელო-ზემო სვანეთის, გურიისა და იმერეთის მხარეში. მომდევნო შეხვედრა 20 აპრილს, შიდა ქართლში გაიმართება.

ირაკლი ღარიბაშვილი პარტიულ აქტივს 100 დღის განმავლობაში, ათ რეგიონში შეხვდება.

ინფორმაციას პარტია „ქართული ოცნების“ პრესსამსახური ავრცელებს. 

აპრილი საქართველოსთვის ერთგვარად საკრალური თვეა. რატომ? - იმიტომ, რომ ჩვენს უახლეს ისტორიას 1989 წლის 9 აპრილის სისხლიანი იარა დღემდე არ მოუშუშებია. ამის მერე იყო 1990 წლის 9 აპრილი - საქართველოს დამოუკიდებლობის აღდგენა 1918 წლის დამოუკიდებლობის აქტის საფუძველზე. მანამდე კი, 1978 წლის აპრილში ანუ იმ დროს, როცა სსრკ-ს ბრეჟნევი მართავდა და ე.წ. პერესტროიკა შორს, ბუზისტოლადაც არ მოჩანდა, საქართველოში დიდი ვნებათაღელვა დაიწყო. ეს წითელ იმპერიაში, პრაქტიკულად, პირველი შემთხვევა იყო, როცა პატარა ერმა საკუთარი ღირსების, ამ შემთხვევაში, ენის დასაცავად ხმა ამოიღო და... სტუდნტობა ქუჩაში გამოვიდა...

მაშინ ორი წლის ვიყავი და, ცხადია, არაფერი მახსოვს, მაგრამ მერე, დრო რომ გავა, იმდროინდელი მოვლენების მონაწილეებს გავიცნობ და 1978 წლის 14 აპრილის „საიდუმლოსაც“ ამოვხსნი. ზოგადად, ეს „საიდუმლო“ დღეს უკვე ყველასთვის ნათელია - 46 წლის წინ, „დედა რუსეთი“ შეეცადა, მამულწართმეული ქართველებისთვის ენაც წაერთმია. კრემლში, ალბათ, არ ელოდნენ, რომ ღვთისმშობლის წილხვედრი ქვეყნის შვილები საკუთარ ენას კბილებით დაიცავდნენ, მაგრამ როცა ქუჩაში უამრავი ადამიანი გამოვიდა, ბოლშევიკების წითელი „ბუნაგი“ იძულებული გახდა, უკან დაეხია. ჰო, მაშინ ქართველებმა სასწაული ერთიანობა და ერთად დგომა აჩვენეს.

მოკლედ, 1978 წელს, საბჭოთა ბელადებმა გადაწყვიტეს, რომ მოკავშირე რესპუბლიკებში, ადგილობრივი ენისთვის სახელმწიფო ენის სტატუსი გაეუქმებინათ და მთელ სსრკ-ში, სახელმწიფო ენა რუსული გამხდარიყო.

ახალი საბჭოთა კონსტიტუციის მიღების შემდეგ, საქართველოს სსრ უზენაესმა საბჭომ შეიმუშავა კონსტიტუციის გეგმა, რომელშიც 1936 წლის კონსტიტუციისგან განსხვავებით, ქართული სახელმწიფო ენად უკვე აღარ იყო გამოცხადებული... თბილისში მასობრივი გამოსვლები დაიწყო და თანდათან, ვითარება უმართავი გახდა. ამიტომ, საქართველოს სსრ-ის კომუნისტური პარტიის პირველი მდივანი‚ ედუარდ შევარდნაძე იძულებული ხდება, ხალხთან გავიდეს. სხვათა შორის, ცხონებულ შევარდნაძეს, კრიტიკულ ვითარებაში მსგავსი ნაბიჯების გადადგმა სჩვეოდა...

ვრცლად სტატია იხილეთ აქ.

საქართველო აქტიურად განაგრძობს რეფორმების დღის წესრიგის განხორციელებას, რადგან ეს პირველ რიგში ესაჭიროება ჩვენი ქვეყნის განვითარებას, ჩვენი ქვეყნის მომავალსა და ევროპულ ინტეგრაციას, - ამის შესახებ საგარეო საქმეთა მინისტრმა ილია დარჩიაშვილმა გერმანიის ფედერაციულ რესპუბლიკაში ჟურნალისტებს განუცხადა.

მისივე თქმით, ქვეყნებს შორის, რომლებიც მხარს უჭერდნენ საქართველოს ევროპულ ინტეგრაციას, გერმანია იყო ერთ-ერთი გამორჩეული.

„ხაზი უნდა გავუსვათ, რომ პრემიერ-მინისტრი, სწორედ თავისი პირველი ორმხრივი ვიზიტით ჩამობრძანდა ევროკავშირში, გერმანიის ფედერაციულ რესპუბლიკაში. გერმანია არის ჩვენი განსაკუთრებული მეგობარი, პარტნიორი, რომელიც, ბოლო პერიოდში, ჩამოყალიბდა ერთ-ერთ მთავარ და ძლიერ მხარდამჭერად ჩვენი ევროპული ინტეგრაციისა. ეს მხოლოდ სიტყვები არ არის, ეს საქმეშიც გამოიხატა. გადაწყვეტილება, რომელიც ევროკომისიამ მიიღო რეკომენდაციის სახით და შემდგომ უკვე ევროპულმა საბჭომ დაადასტურა ჩვენთვის კანდიდატის სტატუსის მონიჭების თაობაზე, ქვეყნებს შორის, რომლებიც ამ მიმართულებით აქტიურად მუშაობდნენ და მხარს უჭერდნენ ჩვენს ევროპულ ინტეგრაციას, გერმანია იყო ერთ-ერთი გამორჩეული.

პრემიერ-მინისტრის დღევანდელი ვიზიტი, ვფიქრობ, ძალიან დროული, ძალიან მნიშვნელოვანი და აუცილებელი იყო. საუბარიო შეეხო საქართველო-გერმანიის ორმხრივ ურთიერთობებში არსებულ ყველა  განზომილებას. საუბრის დროს დაიგეგმა კონკრეტული თანამშრომლობა, თუ როგორ დავაახლოვოთ მომავალში გერმანია და საქართველო ერთმანეთს. რაც ყველაზე მთავარია და ეს პრესკონფერენციაზეც გაჟღერდა კანცლერის მხრიდან, პირადად კანცლერი და გერმანია მომავალშიც გააგრძელებს ჩვენი ქვეყნის მხარდაჭერას ევროპული ინტეგრაციის მიმართულებით.

ვფიქრობ, თუ განვიხილავთ პრესკონფერენციას, რომელიც ძალიან საინტერესო იყო, კანცლერის შეფასება გასათვალისწინებელია იმ თვალსაზრისით, რომ როდესაც საქართველოს ევროპულ ინტეგრაციაზე იყო საუბარი, მან ცალსახად გაუსვა ხაზი იმ რეკომენდაციების ნუსხას, რომელზეც ჩვენ ვმუშაობთ ძალიან აქტიურად, ესაა ჩვენი დღის წესრიგი და რა თქმა უნდა, პრემიერ-მინისტრის მხრიდანაც შეხვედრის დროსაც იყო ხაზგასმული, რომ საქართველო ერთგულია იმ რეფორმების დღის წესრიგის, რომელიც გვაქვს ჩვენ ევროკავშირთან. საქართველო აქტიურად განაგრძობს რეფორმების დღის წესრიგის განხორციელებას, რადგან ეს პირველ რიგში ესაჭიროება ჩვენი ქვეყნის განვითარებას, ჩვენი ქვეყნის მომავალსა და ევროპულ ინტეგრაციას,“- განაცხადა საგარეო საქმეთა მინისტრმა.

მზად ვართ ვისაუბროთ დეტალურად, გახსნილად, გვაქვს მზაობა კონსულტაციებისთვის, იმისათვის, რომ ყველას დავანახოთ, კანონი, რომელიც არის ინიცირებული, ეს არის გამჭვირვალობის კანონი, გამჭვირვალობის ყველა იმ სუბიექტისა, რომელიც მონაწილეობს საზოგადოებრივი აზრის ფორმირებაში, -  ამის შესახებ ვიცე-პრემიერმა, საქართველოს თავდაცვის მინისტრმა ირაკლი ჩიქოვანმა ჟურნალისტებთან საუბრისას განაცხადა.

ვიცე-პრემიერის თქმით, საქართველოში არის გამჭვირვალობის ძალიან მაღალი ხარისხი იმ პირებთან და  სუბიექტებთან მიმართებაში,  რომლებიც მონაწილეობენ აქტიურად საზოგადოებრივ ცხოვრებაში, ფორმირებას უკეთებენ პოლიტიკას, იღებენ გადაწყვეტილებებს.

„წლების განმავლობაში დადასტურდა, რომ საქართველოს და გერმანიას აქვს ძალიან მდგრადი და ახლო ურთიერთობები, რომლებიც ძალიან ბევრ ასპექტს ითვალისწინებს. ეს ურთიერთობები და  მეგობრობა არის იმის საწინდარი, რომ ჩვენ შეგვიძლია ერთმანეთში ვისაუბროთ ისეთ საკითხებზე, რომლებზეც შეიძლება განსხვავებული პოზიცია გვქონდეს, მაგრამ განსხვავებულ პოზიციასთან მიმართებაში ჩვენ არაერთხელ გვითქვამს, რომ ვართ მზად ვისაუბროთ დეტალურად, გახსნილად, გვაქვს მზაობა კონსულტაციებისთვის, იმისათვის, რომ ყველას დავანახოთ, კანონი, რომელიც არის ინიცირებული, ეს არის გამჭვირვალობის კანონი, გამჭვირვალობის ყველა იმ სუბიექტისა, რომელიც მონაწილეობს საზოგადოებრივი აზრის ფორმირებაში. საქართველოში არის გამჭვირვალობის ძალიან მაღალი ხარისხი იმ პირებთან და სუბიექტებთან მიმართებაში,  რომლებიც მონაწილეობენ აქტიურად საზოგადოებრივ ცხოვრებაში, ფორმირებას უკეთებენ პოლიტიკას, იღებენ გადაწყვეტილებებს და როდესაც ასეთი მაღალი სტანდარტი არსებობს და მეორე მხრივ, არასამთავრობო სექტორისა და კონკრეტული სუბიექტების მხრიდან არ არის მზაობა, რომ მინიმალური სტანდარტი მაინც დაინერგოს, ეს არის ნამდვილად გასაკვირი. არავის არ უნდა უკვირდეს, მხოლოდ და მხოლოდ მოთხოვნილია ყოველწლიური დეკლარირების აუცილებლობა, რომ ეს რაიმე ფორმით ეწინააღმდეგება ვინმეს საქმიანობას. კიდევ ერთხელ გავიმეორებ, გამჭვირვალობა არის ერთ-ერთი უმნიშვნელოვანესი ელემენტი დემოკრატიული საზოგადოების“, -  განაცხადა ირაკლი ჩიქოვანმა.

რაც შეეხება კანონპროექტთან დაკავშირებულ საკითებს, ვფიქრობ, ეს იყო არაჩვეულებრივი შესაძლებლობა რომ პრემიერ-მინისტრს თავად გაეზიარებინა ის ხედვები და საჭიროებები, რომელიც დაკავშირებულია მსგავსი ტიპის კანონპროექტის მიღებასთან. ეს არის ქვეყანა, რომელიც არის ოკუპირებული, რომელსაც აქვს უზარმაზარი გამოწვევები და ერთადერთი მექანიზმი, იმისთვის, რომ დავძლიოთ გამოწვევები, არის ის, რომ უნდა ვისაუბროთ გამჭვირვალობაზე, - ამის შესახებ საგარეო საქმეთა მინისტრმა ილია დარჩიაშვილმა გერმანიის ფედერაციულ რესპუბლიკაში ჟურნალისტებს განუცხადა.

მისივე თქმით, გამჭირვალობა არის ერთ-ერთი მთავარი მექანიზმი იმისთვის, რომ საქართველო იყოს წარმატებული ევროპული ქვეყანა.

„ტრანსფარენტულობა - ეს არის ერთ-ერთი მთავარი მექანიზმი იმისთვის, რომ ვიყოთ წარმატებული ევროპული ქვეყანა და ჩვენ გვინდა, რომ ყველა და ყველაფერი იყოს ჩვენს ქვეყანაში გამჭვირვალე, ყველა და ყველაფერი იყოს ტრანსფარენტული, დასამალი არაფერია. ჩვენ გვინდა, რომ ეს ერთ-ერთი ღირებულება, რომელიც არის ერთ-ერთი მთავარი, ვიტყოდი, ქვაკუთხედი და ერთ-ერთი მთავარი კომპონენტი ევროკავშირის შიგნით, ცალსახად საქართველოშიც იყოს გამოყენებული,“- აღნიშნა ილია დარჩიაშვილმა.

დასრულდა საქართველოს დელეგაციის ვიზიტი გერმანიის ფედერაციულ რესპუბლიკაში, სადაც ჩვენ გვქონდა უმაღლესი დონის შეხვედრები, -  ამის შესახებ ვიცე-პრემიერმა, საქართველოს თავდაცვის მინისტრმა ირაკლი ჩიქოვანმა ჟურნალისტებთან საუბრისას განაცხადა. 

როგორც ირაკლი ჩიქოვანმა აღნიშნა, გერმანია ყოველთვის მხარს უჭერდა საქართველოს ტერიტორიულ მთლიანობას,  საქართველოს ევროპულ და ევროატლანტიკურ ინტეგრაციას, ასეც გაგრძელდება და ამის დასტური იყო განცხადებები, რომლებიც გაკეთდა უმაღლეს დონეზე. 

„აქვე მინდა ხაზი გავუსვა იმას, რომ გერმანიას და საქართველოს აქვს ძალიან მაღალი დონის თანამშრომლობა თავდაცვისა და უსაფრთხოების სფეროში. ჩვენ ვისაუბრეთ ამ საკითხთან დაკავშირებითაც. ბოლო წლების განმავლობაში გვაქვს განსაკუთრებით მზარდი დინამიკა და რა თქმა უნდა, იყო მზაობა იმისა, რომ ეს დინამიკა იყოს შენარჩუნებული და ჩვენ  შემდგომში კვლავაც გავაგრძელოთ თანამშრომლობა, რომელი ხელს შეუწყობს ჩვენი ქვეყნის ევროპულ და ევროატლანტიკურ ინტეგრაციას და ჩვენი ქვეყნის თავდაცვის ძალების გაძლიერებას“, -  განაცხადა ვიცე-პრემიერმა.

ყველამ კეთილი უნდა ინებოს და „გამჭვირვალობის კანონთან“ დაკავშირებით წარმოადგინოს არგუმენტები, არგუმენტების გარეშე ჩვენი ღირსების საქმეა, რომ გადაწყვეტილება არ შეიცვალოს, - ამის შესახებ საქართველოს პრემიერ-მინისტრმა, ირაკლი კობახიძემ გერმანიაში ჟურნალისტებს განუცხადა. 

პრემიერის შეფასებით, როდესაც კანონი ითვალისწინებს ერთადერთ რამეს და ეს არის ყოველწლიური ანგარიშების დეკლარირება, შეუძლებელია, ვინმეს ჰქონდეს რაიმე არგუმენტი. 

„ჩვენ მზად ვართ ღია დისკუსიისთვის, მათ შორის თუნდაც საჯარო დისკუსიისთვის, ნებისმიერი, ქართველი, უცხოელი, ვინც არ უნდა იყოს, დაგვიჯდეს ტელევიზიების, კამერების თვალწინ საჯარო დისკუსიაში და ყველა კარგად დაინახავს, რომ არგუმენტი არის ნული. კიდევ ერთხელ გავიმეორებ, იქ, სადაც ერთადერთ რამეს ითვალისწინებს კანონი - ეს არის ყოველწლიური ანგარიშების დეკლარირება, როგორ შეიძლება, ვინმეს ჰქონდეს რაიმე არგუმენტი. კეთილი ინებონ, შემოვიდნენ გახსნილ დისკუსიაში, თუ რაიმე არგუმენტი აქვთ, წარმოადგინონ. არგუმენტების გარეშე, ჩვენ ვერავითარ ვალდებულებას ვერ ვხედავთ, რომ რაიმე განსხვავებული გადაწყვეტილება მივიღოთ იმისგან, რაც აქამდე გვაქვს მიღებული. ყველამ კეთილი უნდა ინებოს და წარმოადგინოს არგუმენტები კანონთან დაკავშირებით, არგუმენტების გარეშე ჩვენი ღირსების საქმეა, რომ გადაწყვეტილება არ შეიცვალოს. ეს არის ჩვენი ეროვნული ღირსების საქმე, სახელმწიფო სუვერენიტეტის საქმე, როცა უარგუმენტოდ რაღაცას ითხოვენ და ამაზე რეაგირება, არის შეურაცხმყოფელი. კიდევ ერთხელ გავიმეორებ, რომ სერიოზული პრობლემები ჩანს ევროპულ ბიუროკრატიაში, რაც გამოიკვეთა დღევანდელ მაგალითზეც, თარჯიმნის მაგალითზე, სხვა კუთხითაც და იმედი გვაქვს, ამ პრობლემებსაც მომავალში მოევლება“, - განაცხადა ირაკლი კობახიძემ.

აშშ-მა მოუხსნას სანქციები მოსამართლეებს და ასევე ბოდიში მოუხადონ ლაშა ჩხიკვაძეს, – ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.

მდინარაძემ უპასუხა ჟურნალისტის კითხვას აშშ-ის მოთხოვნაზე, გამოძიება დაიწყოს იმ მოსამართლეების მიმართ, რომლებზეც კითხვის ნიშნები არსებობს, რაზეც მდინარაძემ აღნიშნა, რომ ამ მოთხოვნაზე მათ მტკიცებულებების წარმოდგენა მოითხოვეს, თუმცა არცერთი მტკიცებულება არ არის, რის გარეშეც, გამოძიების დაწყება არ არის დემოკრატიული სტანდარტი.

„რამდენიმე დღის წინ, ჩვენ გვქონდა მათ მიმართ თხოვნა, მოეხნას სანქციები ჩვენ მოსამართლეებს, რადგან არანაირი მტკიცებულება არ არსებობს. შესაბამისად, ჩვენს კითხვაზე, თხოვნაზე და თუნდაც მოთხოვნაზე, რომ უსამართლო სანქციები მოეხსნათ ქართველი მოსამართლეებისთვის, მივიღეთ პასუხი, რომ გამოძიება დაიწყეთო. ჩვენ მათ ასევე ვთხოვეთ, მტკიცებულებები წარმოედგინათ. არცერთი მტკიცებულება არ არის და მტკიცებულების გარეშე გამოძიების დაწყება არ არის დემოკრატიული სტანდარტი, არც აშშ-სთვის, არც ევროპისთვის და არც საქართველოსთვის. როგორც ამერიკელებს, ასევე ევროპელებს და ქართველებს გვაქვს საერთო ღირებულება – მტკიცებულებების გარეშე გამოძიებას არცერთი ქვეყანა არ იწყებს.

ამ შემთხვევაში, მოთხოვნა, რომ მტკიცებულებების გარეშე დავიწყოთ გამოძიება, არ არის სწორი მოთხოვნა, რბილად რომ ვთქვათ. პირიქით, ჩვენ მათ გაღმა ვედავებით ამ დისკუსიაში, ან მოუხსნან სანქციები მოსამართლეებს, ასევე ბოდიში მოუხადონ მოსამართლე ლაშა ჩხიკვაძეს. თუ მათ ასე არ უნდა გააკეთონ, მაშინ მოგვცენ მტკიცებულებები, რის საფუძველზეც დაასანქცირეს ეს ხალხი და გამოიძიებს ქართული მხარე“, – განაცხადა მამუკა მდინარაძემ.

საზოგადოებრივი აზრის გამოკითხვა "მთავარი არხის" დაკვეთით, "სოციალური კვლევისა და ანალიზის ინსტიტუტმა "(ISSA) ჩაატარა.

ხვალ რომ საპარლამენტო არჩევნები გაიმართოს, რომელ პოლიტიკურ პარტიას დაუჭერდით მხარს პირველ რიგში? - ამ კითხვის შედეგები ასე განაწილდა:

ევროპული საქართველო - 1.4%
ახალი - 9.1%
ერთიანი ნაციონალური მოძრაობა/სტრატეგია აღმაშენებელი 9.6%
მოქალაქეები - 1.4%
პატრიოტთა ალიანსი - 0.4%
ლელო საქართველოსთვის - 3.0%
ლეიბორისტული პარტია - 1.7%
რესპუბლიკური პარტია - 0.2%
კანონი და სამართალი - 0.2%
საქართველოსთვის - 3.3%
ერი (ერთობა რაობა იმედი) - 0.3%
სამართლიანობისთვის -0.4%
გირჩი - მეტი თავისუფლება/დროა - 1.1%
ქართული ოცნება -31.4%
ხალხისთვის - 1.1%
გირჩი - 1.0%
ხალხის ძალა - 0.4%
ერთიანი საქართველო - დემოკრატიული მოძრაობა -1.3%
კონსერვატიული მოძრაობა - ალტ-ინფო -1.4%
სხვა პარტია - 0.2%
არ წავალ არჩევნებზე - 3.3%
არცერთ პარტიას - 6.9%
არ ვიცი/ჯერ არ გადამიწყვეტია - 17.3%;
უარი პასუხზე - 3.6%

მიმდინარეობს მიზანმიმართული კამპანია, რომ რამენაირად მოახდინონ ჩემი სახელისა და ზოგადად ჩემი ოჯახის დისკრედიტაცია, მაგრამ ეს არ მუშაობს, – ამის შესახებ „ქართული ოცნების“ თავმჯდომარემ, ირაკლი ღარიბაშვილმა ჟურნალისტებს ამბროლაურში განუცხადა.

ირაკლი ღარიბაშვილს „ტვ პირველის“ ჟურნალისტმა კითხვა დაუსვა ღარიბაშვილის მამის ბიზნესსაქმიანობაზე მომზადებულ სიუჟეტთან დაკავშირებით, რაზეც ღარიბაშვილმა განაცხადა:

„მართლაც მეუხერხულება ამ საკითხებზე საუბარი – საზოგადოებამ, ყველამ ყველაფერი ძალიან კარგად იცის. ეს არის მიზანმიმართული კამპანია ჩემ წინააღმდეგ, რომ რაიმენაირად მოახდინონ დისკრედიტაცია ჩემი სახელისა და ზოგადად, ჩემი ოჯახის დისკრედიტაცია. ეს არახალია. იცით, რომ ჯერ კიდევ 2012 წლამდე ჩემი ოჯახის წევრი დაიჭირა თქვენმა ხელისუფლებამ და რომ არ მოგვეგო ჩვენ მაშინ, რა თქმა უნდა ამ კაცს მოკლავდნენ, მე ციხეში დამიჭერდნენ. იცით, რომ პოლიტიკაში მოსვლის დღიდან, პირველივე დღეებიდან რამხელა აღვირახსნილი კამპანია წარმოებდა ჩემ წინააღმდეგ. ეს არის დისკრედიტაციის მცდელობა. მეორე – იცით, რომ რაღაც პერიოდი მე აღარ ვიყავი პოლიტიკაში და მაშინაც გაგრძელდა ეს კამპანია. დავბრუნდი პოლიტიკაში და გაგრძელდა. აღარ ვარ პრემიერ-მინისტრი, გააგრძელეს და აგრძელებთ ამ კამპანიას. მაგრამ, ერთი რამ ვერ გაიგეთ თქვენ – რომ არ მუშაობს. ხალხმა ძალიან კარგად იცის, ვინ არის ირაკლი ღარიბაშვილი, ასე რომ, ყველა კითხვაზე არის პასუხი გაცემული. თუ დამატებით რაიმე კითხვები არსებობს, ამას ჩემი ოჯახის ადვოკატი გასცემს პასუხს და, რა თქმა უნდა, მოგიწევთ თქვენ პასუხის გაცემა სასამართლოში“, – განაცხადა ირაკლი ღარიბაშვილმა.

სალომე ზურაბიშვილმა, ლაზარე გრიგორიადისის შეწყალებით, „მოლოტოვის კოქტეილი“ ესროლა პოლიციელს, ეს არის ჩემი შეფასება, – ამის შესახებ „ქართული ოცნების“ თავმჯდომარე ირაკლი ღარიბაშვილმა ამბროლაურში ჟურნალისტებს განუცხადა.

ღარიბაშვილის თქმით, სალომე ზურაბიშვილმა ამ გადაწყვეტილებით ბოლომდე უღალატა არა მხოლოდ პარტიას, ხალხსა და ქვეყანას, მან უღალატა ქართლ პოლიციას.

„ძალიან ვცდილობ, მოზომილი ვიყო ჩემს შეფასებაში. აი, რა უნდა ვუწოდოთ ახლა ასეთ გადაწყვეტილებას და როგორ შეიძლება, ამ გადაწყვეტილებას არ ვუწოდოთ ანტისახელმწიფოებრივი. ადამიანმა შეიწყალა პირი, რომელმაც „მოლოტოვის კოქტეილი“ ესროლა ჩვენს საამაყო პოლიციას და ცოცხლად დაწვა სურდა ჩვენი ერთ-ერთი გმირი პოლიციელის. ეს ხომ ფაქტია. ყველამ კარგად ნახა ეს კადრები, მთელმა ქვეყანამ და მთელმა მსოფლიომ ნახა, როგორ ესროლა „მოლოტოვის კოქტეილი“ ამ პიროვნებამ და როგორ სასწაულებრივად გადარჩა ჩვენი გმირი პოლიციელი.

ფაქტებით, მტკიცებულებებით აღიარა ამ კაცმა, რომ მე ვესროლე „მოლოტოვის კოქტეილიო“ და ამის შემდეგ ეს ექსტრემისტი პირი შეიწყალა ე.წ. პრეზიდენტმა. არ მოვერიდები ამის თქმას, ეს არის უკვე ანტისახელმწიფოებრივი ქმედება. ის, რომ ამ ქალმა საერთოდ დაივიწყა კონსტიტუცია, კანონი, პატივს არ სცემს ჩვენს ქვეყანას, ხალხს, ამომრჩეველს, საკუთარ ამომრჩეველზე აღარ მაქვს საუბარი. ის, რომ ბოლომდე უღალატა მან არა მარტო ჩვენს ამომრჩეველს, პარტიას და ხალხს და ქვეყანას, მან უღალატა ჩვენს პოლიციას. მან შეურაცხყოფა მიაყენა ჩვენს პოლიციას.

ბოლო რამდენიმე თვე აქვს დარჩენილი ე.წ. პრეზიდენტობის, როგორ უნდა შეძლოს მან ამ საქმიანობის განხორციელება, ჩემთვის წარმოუდგენელია. ეს არის ძალიან დიდი სირცხვილი და ჩემს თვალში, ეს არის დანაშაული პოლიციის წინააღმდეგ. იგი არის თანამონაწილე. სალომე ზურაბიშვილმა „მოლოტოვის კოქტეილი “ესროლა პოლიციელს ამ შეწყალებით. აი, ეს არის ჩემი შეფასება. ამიტომ, სალომე ზურაბიშვილს პასუხს გასცემს ჩვენი ხალხი. რამდენიმე თვეში იგი აღარ იქნება ჩვენი პრეზიდენტი და ჩაეწერება, როგორც „მოლოტოვის კოქტეილის“ შემწყალებელი, მსროლელი და თანამონაწილე ამ დიდი დანაშაულისა. სამარცხვინოა და დანაშაულია ეს ყველაფერი“, – განაცხადა ირაკლი ღარიბაშვილმა.

თბილისში 2023 წლის 7, 8, 9 მარტს გამართულ აქციებზე პოლიციელებზე თავდასხმისა და ნივთის დაზიანების ფაქტებზე ბრალდებულ ლაზარე გრიგორიადისს სასამართლომ ცხრა წლით თავისუფლების აღკვეთა გუშინ მიუსაჯა. გუშინვე, პრეზიდენტმა, სალომე ზურაბიშვილმა განაცხადა, რომ ლაზარე გრიგორიადისი შეიწყალა, თუმცა ჯერ გადაწყვეტილებაზე ხელი არ მოუწერია.