მერილენდის შტატში მომხდარი სროლისას 5 მოზარდი დაიჭრა. ამის შესახებ ABC News-ი იტყობინება.

ინციდენტი ქალაქ გრინბელტის ერთ-ერთ პარკში მოხდა, სადაც სკოლიდან გამოპარული ასობით მოსწავლე იყო შეკრებილი.

კონფლიქტის მიზეზი უცნობია - ფაქტს პოლიცია იძიებს.

ნიუ-იორკში, სასამართლოს შენობასთან, სადაც  შეერთებული შტატების ყოფილი პრეზიდენტის, დონალდ ტრამპის პროცესი მიმდინარეობს, უცნობმა მამაკაცმა თავი დაიწვა.

თვითმხილველების თქმით, საწვავის გადასხმამდე მამაკაცმა ბროშურები გაფანტა.

უცხოური მედია წერს, რომ მამაკაცი მრავლობითი დამწვრობით საავადმყოფოში გადაიყვანეს, თუმცა მისი გადარჩენა ვერ მოხერხდა.

მამაკაცის ქმედების მოტივი უცნობია.

რუსეთის საგარეო საქმეთა მინისტრმა სერგეი ლავროვმა საქართველოში ჩატარებულ მასშტაბურ აქციებზე გააკეთა კომენტარი:

"საქართველოში ყველა ამ დემონსტრაციამ სალომე ზურაბიშვილი სიტყვის თავისუფლებისთვის მებრძოლად აქცია, თუმცა კანონი ურბილესია, თავად აშშ-ში, საფრანგეთში, პოლონეთში, ევროკავშირის სხვა მრავალ ქვეყანაში არსებობს კანონები ჯარიმებით, სისხლისსამართლებრივი პასუხისმგებლობით, თუ ფულს იღებ, ამაზე არ ლაპარაკობ და რაღაცას არასწორად აკეთებ. ქართველებთან, მთლიანობაში რომ ვთქვათ, უფრო მარტივია, თუ იღებ 20%-ზე მეტ დაფინანსებას უცხოეთიდან საკუთარი ორგანიზაციისთვის უბრალოდ დაადეკლარირე."

აშშ-ის ვეტოს გამო, გაეროს უშიშროების საბჭომ ვერ მიიღო რეზოლუცია გაეროში პალესტინის სახელმწიფოს სრულუფლებიან წევრად მიღების შესახებ.

უშიშროების საბჭოს 15 მუდმივი და დროებითი წევრიდან რეზოლუციას მხარი დაუჭირა 12-მა სახელმწიფომ. თავი შეიკავეს შვეიცარიამ და ბრიტანეთმა.

რეზოლუციის პროექტი გაეროს გენერალურ ასამბლეას რეკომენდაციას აძლევდა, ეღიარებინა პალესტინის სახელმწიფო გაეროს 194-ე წევრად. ამისთვის საჭირო იყო უშიშროების საბჭოს თანხმობა.

გაეროს 139 წევრი ქვეყანა აღიარებს პალესტინის სახელმწიფოს.

აშშ-ის პოზიციით, პალესტინის სახელმწიფოს გაეროში წევრობა შეიძლება მოჰყვეს ორი სახელმწიფოს შესახებ ისრაელთან შეთანხმებას.

კრემლთან დაახლოებული წყაროებიდან დაფინანსებაში კიდევ ერთი ევროპარლამენტარია ეჭვმიტანილი.

გერმანული მედიის ცნობით, საუბარია გერმანელ პარლამენტარ მაქსიმილიან კრაზე, რომელიც ამერიკის ფედერალური ბიუროს საგამოძიებო სამსახურმა, ამერიკაში ვიზიტის დროს, კრემლის აგენტების მიერ შესაძლო დაფინანსების გამო დაკითხა.

ერთობლივი გამოძიება Spiegel-ის ZDF-ის ჟურნალისტებმა ჩაატარეს. მათთან საუბარში მაქსიმილიან კრა ადასტურებს, რომ აშშ-ში ნამდვილად დაკითხეს, თუმცა რუსეთისგან დაფინანსებას უარყოფს.

კრა, რომელიც ევროპარლამენტის მომავალ არჩევნებშიც გერმანიის ულტრამემარჯვენე „ალტერნატივა გერმანიისთვის“ ევროპარლამენტარობის მთავარი კანდიდატია, მოხსენებულია ჩეხეთის დაზვერვის მონაცემებშიც.

ჩეხეთის დაზვერვის ინფორმაციით, რუსები ევროპელ პოლიტიკოსებზე ცდილობენ გავლენის მოხდენას.

ჩეხეთის კონტრდაზვერვის სამსახურში განაცხადეს, რომ კრემლმა „ევროპის ხმის“ ვებგვერდი გამოიყენა პრორუსული ნარატივების პოპულარიზაციისა და მოსკოვის მეგობარი პოლიტიკოსების დასაფინანსებლად.

ამასთან, Spiegel-ის მიერ ადრე ჩატარებული გამოძიების მიხედვით, კრას კოლეგა პეტრ ბისტრონი იყო ერთ-ერთი მათგანი, ვინც თანხებს იღებდა რუსეთიდან. კრამ და ბაისტრონმა ასევე მისცეს ინტერვიუები „ევროპის ხმას“.

„შპიგელის“ გამომძიებელი ჟურნალისტების მოსაზრებით, ამერიკელ გამომძიებლებს წვდომა ჰქონდათ კრას და პრორუსი აქტივისტის, ოლეგ ვოლოშინის მიმოწერაზე, სადაც გერმანელ კანონმდებელს “ტექნიკური ხარჯების კომპენსაციას“ დაჰპირდნენ. კრამ უარყო ვოლოშინისგან ფულის მიღების ფაქტი და თქვა, რომ საქმე გვაქვს შეტყობინებების არასწორ ინტერპრეტაციასთან. ამის მიზეზად ის ვოლოშინის „ცუდ ინგლისურს“ ასახელებს.

რუსეთის შესაძლო გავლენაზე გამოძიება ბელგიაშიც მიმდინარეობს. ბელგიის პრემიერი ალექსანდრ დე კროო აცხადებს, რომ კრემლს იმედი აქვს, რომ პრორუს პოლიტიკოსებს შეიყვანს.

ევროპარლამენტის არჩევნები 6-9 ივნისს გაიმართება.

აშშ-ის ყოფილი პრეზიდენტის დონალდ ტრამპის ისტორიული საქმისთვის 12 ნაფიცი მსაჯული შეარჩიეს. მომავალი რამდენიმე კვირის განმავლობაში ისინი პორნოვარსკვლავის დუმილისთვის ფულის გადახდის საქმეს განიხილავენ.

ამასთან, დაცვისა და ბრალდების მხარეებმა ისტორიული სასამართლო პროცესისთვის ნაფიც მსაჯულთა ალტერნატიული წევრები ჯერ კიდევ უნდა აირჩიონ.

ამავე დღეს მოსამართლემ, რომელიც თვალს ადევნებდა პროცესს, გაათავისუფლა ნაფიცი მსაჯული, რომელმაც თქვა, რომ ეშინოდა, რომ ზოგიერთი პერსონალური ინფორმაცია საჯარო გახდებოდა. მოსამართლე ხუან მერჩანმა გაათავისუფლა კიდევ ერთი მსაჯული, მას შემდეგ რაც პროკურორებმა განაცხადეს, რომ შესაძლოა, მან წარსული კანონდარღვევები არ გაამჟღავნა.

მსაჯულების შერჩევა ორშაბათს დაიწყო. პირველი 196 მსაჯულიდან, რომელმაც შერჩევა გაიარა, თითქმის ნახევარი გაათავისუფლეს მას შემდეგ, რაც განაცხადეს, რომ მიუკერძოებლად არ შეეძლოთ შეეფასებინათ რესპუბლიკელი პოლიტიკოსის დანაშაული ან უდანაშაულობა.

ტრამპის კრიტიკამ მოწმეების, პროკურორების, მოსამართლის და მათი ნათესავების მიმართ ამ საქმეში და სხვათა მიმართ, ასევე გამოიწვია შეშფოთება შევიწროებაზე, რამაც მერჩანს აიძულა, ინფორმაცია გაუმჟღავნებლობაზე ნაწილობრივი ბრძანება გამოეცა.

აშშ-ის ისტორიაში ეს პირველი შემთხვევაა, როდესაც ყოფილი პრეზიდენტი სისხლის სამართლის საქმეზე სასამართლოს წინაშე წარდგა. 

დონალდ ტრამპს სისხლის სამართლის ოთხ საქმეზე აქვს ბრალი წარდგენილი, თუმცა ეს შეიძლება ერთადერთი იყოს, რომლის სასამართლო პროცესი ნოემბრის არჩევნებამდე დაიწყება. აშშ-ის ყოფილი პრეზიდენტი ყველა ბრალს უარყოფს და მათ პოლიტიკურად მოტივირებულებს უწოდებს.

ნიუ-იორკის სასამართლო პროცესი 25 მარტს უნდა დაწყებულიყო, მაგრამ ტრამპის ადვოკატებმა მოსამართლეს პროცესის გადადებით მიმართეს, რათა საქმეში ახლად აღმოჩენილი გარემოებები განეხილათ. 

სტორმის დენიელსის საქმის საქმის მასალების თანახმად, 2016 წლის საპრეზიდენტო არჩევნებამდე ტრამპმა მისი ადვოკატის დახმარებით დენიელსს 130 ათასი დოლარი გადაუხადა, რათა მასთან სექსუალური კავშირის შესახებ არაფერი ეთქვა. თვითონ გადახდა უკანონო არ ყოფილა, მაგრამ პროკურორები ამბობენ, რომ ის გაფორმებული იყო, როგორც ადვოკატის ანაზღაურება იურიდიული სამსახურისთვის, რაც შტატში ანგარიშვალდებულების გაყალბებად მიიჩნევა და სისხლის სამართლებრივად ისჯება.

ადვოკატ მაიკლ კოენს აღნიშნულ საქმეზე 2018 წელს 3 წლით თავისუფლების აღკვეთა მიუსაჯეს, თუმცა ტრამპს, რომელსაც მაშინ პრეზიდენტის თანამდებობა ეკავა, ოფიციალური ბრალი არ წაუყენეს.

გარდა ამისა ტრამპს სამ საქმეზე აქვს ბრალი წარდგენილი. საიდუმლო დოკუმენტების შენახვის საქმის პროცესი მაისშია ჩანიშნული, ხოლო ჯორჯიის შტატის ხელისუფლება ამ შტატში საპრეზიდენტო არჩევნების შედეგების შეცვლის მცდელობის საქმეზე განხილვის დაწყებას აგვისტოში მოითხოვს.

კიდე ერთი პროცესი არჩევნების შედეგების გასაუქმებლად შეთქმულების მოწყობასა და კაპიტოლიუმზე შტურმში ტრამპის როლს გულისხმობს.

უკრაინის სამართალდამცველებმა, პოლონელ კოლეგებთან თანამშრომლობით, დააკავეს პოლონეთის მოქალაქე, რომელიც ეჭვმიტანილია რუსულ სპეცსამსახურებთან თანამშრომლობაში პრეზიდენტ ზელენსკიზე თავდასხმის მოწყობის მოსამზადებლად. ამის შესახებ ინფორმაციას უკრაინის უსაფრთხოების სამსახური ავრცელებს.

გამოძიების ცნობით, ეჭვმიტანილმა საკუთარი ინიციატივით დაამყარა კონტაქტი რუსეთის შეიარაღებული ძალების მეთაურობის წარმომადგენლებთან და შესთავაზა მათ რუსული სამხედრო დაზვერვის სასარგებლოდ მუშაობა.

უკრაინული მხარის ცნობით, მას ევალებოდა პოლონეთში მდებარე ჟეშუვ-იასეონკის აეროპორტის უსაფრთხოების შესახებ ინფორმაციის შეგროვება და რუსული მხარისთვის მიწოდება. ეს უნდა დახმარებოდა რუსულ სპეცსამსახურებს უკრაინის პრეზიდენტზე შესაძლო თავდასხმის დაგეგმვაში პოლონეთში ვიზიტის დროს.

როგორც უკრაინული მედია წერს, შესაძლო დანაშაულის დაგეგმვის შესახებ უკრაინის პროკურატურამ და უსაფრთხოების სამსახურმა პოლონურ მხარეს აცნობეს და საქმის მტკიცებულებები გადასცეს. ორ ქვეყანას შორის ინფორმაციის გაცვლისა და წარმატებულად ჩატარებული ოპერატიული მოქმედებების შედეგად, რუსეთის სპეცსამსახურების სასარგებლოდ მუშაობაში ეჭვმიტანილი პოლონეთის ტერიტორიაზე დააკავეს. პროკურატურის ბრალდების საფუძველზე, ვარშავის სასამართლომ მას წინასწარი პატიმრობა შეუფარდა.

რუსეთში, სევასტოპოლის მხარეში Ту-22М3 ტიპის ბომბდამშენი ჩამოვარდა. გუბერნატორი, ვლადიმერ ვლადიმროვი ავრცელებს ინფორმაციას, რომ ორი პილოტი კლინიკაში გადაიყვანეს, შემთხვევის ადგილიდან ეკიპაჟის კიდევ ერთი წევრის ევაკუაცია მოხდა, ხოლო მეოთხე პირს, ეძებენ.

მოგვიანებით, რუსულმა პროპაგანდისტულმა გამოცემამ RIA Novosti-მ, თავდაცვის სამინისტროზე დაყრდნობით გაავრცელა ინფორმაცია, რომ ბომბდამშენი საბრძოლო დავალების შესრულების შემდეგ ჩამოვარდა აეროდრომზე დაბრუნებისას. 

"რია" წერს, რომ ბორტზე საბრძოლო მასალა არ იყო.

აშშ-ის ყოფილი პრეზიდენტის, დონალდ ტრამპის უპრეცედენტო სასამართლო პროცესი 18 აპრილს განახლდება ნიუ-იორკში. მოსამართლე შეეცდება, დაასრულოს მსაჯულთა შერჩევა და მომავალი კვირის დამდეგს დაიწყოს არგუმენტების მოსმენა პოლიტიკურად ფეთქებადი საქმის თაობაზე.

ისტორიაში ეს სისხლის სამართლის პირველი საქმეა შეერთებული შტატების ყოფილი პრეზიდენტის წინააღმდეგ, თანაც ისეთისა, რომელიც ხელახლა არჩევისთვის იბრძვის საპრეზიდენტო არჩევნებში.

ტრამპს ბრალს სდებენ იმაში, რომ ის შეეცადა დაემალა პორნომსახიობ სტორმი დენიელსისთვის 130 ათასი დოლარის გადახდის ფაქტი 2016 წლის საპრეზიდენტო არჩევნების წინ, რომელშიც მან გამარჯვება მოიპოვა.

ნიუ-იორკის შტატის პროკურატურა ამტკიცებს, რომ ეს საქციელი შეიძლება განხილულ იქნეს როგორც ტრამპის მხრიდან თაღლითობა ან ფინანსური დოკუმენტების გაყალბება. ეს შეიძლება კვალიფიცირდეს სისხლის სამართლის დანაშაულად.

დენიელსი ამტკიცებს, რომ მას ტრამპთან სექსი ჰქონდა 2006 წელს და რომ ტრამპის ყოფილმა ადვოკატმა მაიკლ კოენმა მას ფული გადაუხადა, რათა ეს ამბავი არ გაეხმაურებინა.

დონალდ ტრამპს, რომელიც წლევანდელი საპრეზიდენტო კანდიდატია, თაღლითობის 34 ბრალდება აქვს წაყენებული. ტრამპი უარყოფს რაიმე სამართლებრივ კანონდარღვევას, ასევე უარყოფს, რომ დენიელსთან რომანი ჰქონდა.

სასამართლოს შენობასთან ჟურნალისტებთან ერთად თავი მოიყარეს ტრამპის მომხრეებმა და მოწინააღმდეგეებმა. სასამართლოს შენობის გარშემო დადიოდა სატვირთო მანქანა ექსპრეზიდენტის საარჩევნო კამპანიის დროშით. ტრამპის ათეულობით მოწინააღმდეგეს ეჭირა ტრანსპარანტები წარწერით „ვერავინ იდგება კანონზე მაღლა“.

ევროკავშირის ქვეყნები ირანის წინააღმდეგ სანქციების გაფართოებაზე შეთანხმდნენ. ისრაელზე უპრეცედენტო თავდასხმის შემდეგ ევროკავშირმა გადაწყვიტა სანქციები დაუწესოს ირანელ დრონებისა და რაკეტების მწარმოებლებს. ინფორმაციას ევროპული საბჭოს პრეზიდენტი, შარლ მიშელი ავრცელებს.

"ძალიან მნიშვნელოვანია ირანის იზოლაციაში მოქცევისთვის ყველაფერი გაკეთდეს". - აღნიშნა მიშელმა.

ევროკავშირს ირანის წინააღმდეგ ამ დრომდეც არაერთი სანქცია ჰქონდა დაწესებული, მათ შორის, მოსკოვისთვის დრონების მიყიდვის გამო, რასაც რუსეთი უკრაინის წინააღმდეგ ომში იყენებს.

ევროკავშირის წევრი ქვეყნები ახალ სანქციებზე ბრიუსელში მიმდინარე ორდღიან სამიტზე შეთანხმდნენ. გაერთიანების 27 ქვეყნის ლიდერები ირანის მიერ ისრაელზე თავდასხმის შემდეგ პირველად შეხვდნენ.

"ჩვენ ვგმობთ ირანის მიერ ისრაელზე თავდასხმას. გადავწყვიტეთ ირანის წინააღმდეგ ახალი სანქციების დაწესება. ეს არის მკაფიო მესიჯი. ასევე გვინდა, გავაკეთოთ ყველაფერი, რათა დავიცვათ მოქალაქეები. თითოეული მოქალაქის სიცოცხლე მნიშვნელოვანია". - თქვა მიშელმა.

უკრაინის პრეზიდენტმა, ვოლოდიმირ ზელენსკიმ სიტყვით მიმართა ევროპული საბჭოს სამიტის მონაწილეებს და ევროპელ ლიდერებს მოუწოდა, სასწრაფოდ მიაწოდონ უკრაინას საჰაერო თავდაცვის სისტემები.

„დღევანდელი დილა უკრაინაში რუსეთის მორიგი ტერაქტით დაიწყო. ჯამში 60-ზე მეტი ადამიანი დაშავდა, მათ შორის ბავშვები. სამწუხაროდ, 17 ადამიანი დაიღუპა. ეს ასახავს ჩვენს ამჟამინდელ მთავარ საჭიროებას: ჩვენ გვჭირდება საჰაერო თავდაცვის სისტემები“, - აღნიშნა უკრაინის პრეზიდენტმა.

„ჩვენ დარწმუნებულნი ვართ, რომ ევროპა უნდა დავიცვათ ბალისტიკური რაკეტებისა და [ირანული წარმოების] დრონებისგან, ფრთოსანი რაკეტებისა და ბომბებისგან, როგორც ეს მოხდა ისრაელისა და რეგიონის სხვა ქვეყნების საჰაერო სივრცეში. ჩვენი [უკრაინის] ცა და ჩვენი მეზობლების ცა უსაფრთხოების იგივე დონეს იმსახურებს. მადლობას ვუხდი ყველას, ვისაც ესმის უსაფრთხოების სფეროში ჩვენი საჭიროებები“, - განაცხადა ვოლოდიმირ ზელენსკიმ.

"ამ კანონპროექტს რუსული არ უნდა ეწოდოს", - ამის შესახებ კრემლის პრესსპიკერი დიმიტრი პესკოვი საუბრობს "ამ კანონპროექტს რუსული არ უნდა ეწოდოს. ფაქტია, რომ ამერიკის შეერთებული შტატები იყო, ალბათ, პირველი, ვინც დაიწყო მისი შიდა პოლიტიკური ჰიგიენის მონიტორინგი. სწორედ მათ შემოიღეს ეს პრაქტიკა, ეს არანაირად არ არის რუსული, ახლა ეს ნორმალური პრაქტიკაა სახელმწიფოების დიდი ნაწილისთვის, რომლებიც ყველაფერს აკეთებენ, რომ დაიცვან თავი გარე გავლენისგან, საგარეო გავლენისგან შიდა პოლიტიკაზე", - ამბობს პესკოვი.

აქვე, მან აღნიშნა, რომ ყველა ქვეყანა ამა თუ იმ ფორმით მოქმედებს, თუმცა ყველა კანონპროექტს საერთო მიზანი აქვს:

"ისინი ცდილობენ, გამოიყენონ ეს შიდაპოლიტიკური პროცესი ანტირურული სენტიმენტების პროვოცირებისთვის. ნაკლებად სავარაუდოა, რომ ეს იმპულსები გარედან მოდიოდეს. ჩვენ კარგად გვესმის, რა ხდება", - ამბობს პესკოვი.