იტალიელი მოდის დიზაინერი რობერტო კავალი 83 წლის ასაკში გარდაიცვალა. ინფორმაციას ამის შესახებ მისი კომპანია ავრცელებს.

ცნობილი მოდის დიზაინერი ხანგრძლივი ავადმყოფობის შემდეგ ფლორენციაში სახლში გარდაიცვალა.

კავალიმ ბრენდი საკუთარი სახელით 1970 წელს დააარსა.

Reuters-ის ცნობით, აშშ-მა ტერორისტულ ორგანიზაცია "ჰამასის" წინააღმდეგ სანქციები დააწესა, რომლებიც დაჯგუფების წარმომადგენელსა და დრონების ქვედანაყოფის ხელმძღვანელებს ეხება.

ტერორიზმისა და ფინანსური დაზვერვის საკითხებში მინისტრის მოადგილემ, ბრაიან ნელსონმა, თქვა, რომ ეს ნაბიჯი "აძლიერებს მუდმივ, ერთობლივ ყურადღებას, რომელიც მიმართულია იმისკენ, რომ არ მისცეს "ჰამასს" შემდგომი თავდასხმების განხორციელების საშუალება. მათ შორის, კიბერომისა და [დრონების] წარმოების გზით."

დეპარტამენტის განცხადებაში ასევე ნათქვამია, რომ "ჰამასის" წინააღმდეგ სანქციები პარალელურად ევროკავშირცმაც გამოაცხადა.

პუტინს მხოლოდ სიტყვები ვერ შეაჩერებს, უნდა დავაჩქაროთ და გავაფართოოთ უკრაინისადმი ჩვენი სამხედრო მხარდაჭერა, – ამის შესახებ საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენელი ჯოზეფ ბორელი სოციალურ ქსელში წერს:

„გუშინ რუსეთმა ისევ განახორციელა ბარბაროსული დარტყმა უკრაინაზე მისი ხალხისა და კრიტიკული ინფრასტრუქტურის წინააღმდეგ. მხოლოდ სიტყვები პუტინს ვერ შეაჩერებს. ჩვენ უნდა უზრუნველვყოთ მეტი სამხედრო მხარდაჭერა. 22 აპრილის საბჭოს სხდომის წინ, დღეს მე მივწერე ევროკავშირის საგარეო საქმეთა და თავდაცვის მინისტრებს. ჩვენ უნდა დავაჩქაროთ და გავაფართოოთ უკრაინისადმი სამხედრო მხარდაჭერა. ჩვენ უნდა მივაწოდოთ უკრაინას საჰაერო თავდაცვის სისტემები რუსეთის რაკეტების გასანადგურებლად, ქალაქებისა და კრიტიკული ინფრასტრუქტურის დასაცავად. დახმარებას სიცოცხლესა და სიკვდილს შორის, მნიშვნელობა ექნება“

ევროკავშირის უმაღლესი წარმომადგენლის თქმით, მან უკრაინის მთავრობას მაისში უკრაინის თავდაცვითი მრეწველობის ფორუმის ერთობლივად გამართვა შესთავაზა.

აშშ-ის კიბერუსაფრთხოებისა და ინფრასტრუქტურის უსაფრთხოების სააგენტო(CISA) იტყობინება, რომ რუსმა ჰაკერებმა წვდომა მოიპოვეს Microsoft-ისა და შეერთებული შტატების რამდენიმე ფედერალური სააგენტოს მიმოწერაზე.

ორგანიზაციის ვებგვერდზე გამოქვეყნებული დოკუმენტის თანახმად, სააგენტომ დაავალა ფედერალურ სამთავრობო უწყებებს, "დაუყოვნებლივ შეამცირონ მნიშვნელოვანი რისკი, რომელიც დაკავშირებულია რუსეთის სახელმწიფოს მიერ დაფინანსებულ კიბერსაფრთხესთან."

საუბარია ჰაკერული ჯგუფის, Midnight Blizzard-ის მიერ იანვარში განხორციელებულ კიბერშეტევაზე, რომელიც რუსეთთან ასოცირდება. თავდასხმის შედეგად ჰაკერებმა მოახერხეს Microsoft-ის ელექტრონული ფოსტის ანგარიშების გატეხა.

სააგენტომ არ დაასახელა კონკრეტული დეპარტამენტები, რომელთა წერილებიც ჰაკერებმა გატეხეს, მაგრამ აღნიშნა, რომ მათ მიიღეს მიზნობრივი გაფრთხილება.

"ჩვენ მოვითხოვთ დაუყოვნებლივ მოქმედებას ჩვენი ფედერალური სისტემებისთვის რისკების შესამცირებლად, - თქვა CISA-ს დირექტორმა ჯენ ისტერლიმ, - რამდენიმე წელია, აშშ-ის მთავრობა რუსეთის მიერ ორგანიზებულ მავნებლურ კიბერაქტივობას დოკუმენტურად სწავლობს. ახლა ამ გრძელ სიას Microsoft-ი ემატება. ჩვენ გავაგრძელებთ ძალისხმევას ფედერალურ მთავრობასთან და კერძო სექტორში ჩვენს პარტნიორებთან თანამშრომლობით, რათა დავიცვათ ჩვენი სისტემები ასეთი საფრთხისგან."

აშშ-სა და ევროპაში სამთავრობო უწყებების წინააღმდეგ ჰაკერული თავდასხმები ბოლო დროს გახშირდა. ბოლო თვეების განმავლობაში ყველაზე დიდი ასეთი თავდასხმა იყო გერმანიის ბუნდესვერის ოფიცრების საუბრის გაჟონვა ინტერნეტში, რომელშიც ისინი მსჯელობენ ბალისტიკური რაკეტა „Taurus-ის" შესაძლო თავდასხმაზე ყირიმის ხიდზე.

ჩანაწერი რუსეთის Russia Today-ს ხელმძღვანელმა მარგარიტა სიმონიანმა გამოაქვეყნა 1 მარტს.
საუბრის მონაწილეები განიხილავენ კიევისთვის „ტაურუსის“ ტიპის ფრთოსანი რაკეტების მიწოდებას, რაც გერმანიის კანცლერმა ოლაფ შოლცმა ჯერჯერობით უარყო.
კანცლერმა ჟურნალისტებს უთხრა, რომ ინფორმაციის შესაძლო გაჟონვა „ძალიან სერიოზულია“.
გერმანიის თავდაცვის მინისტრმა ბორის პისტორიუსმა 3 მარტს განაცხადა, რომ რუსეთს „საინფორმაციო ომი“ აქვს გაჩაღებული, რომლის მიზანი გერმანიის შიგნით უთანხმოების გაღვივებაა.
რუსეთი ჰაკერულ თავდასხმებში მონაწილეობას უარყოფს.

თურქეთი უკრაინის პრეზიდენტს ვოლოდიმირ ზელენსკისა და რუსეთის პრეზიდენტს ვლადიმერ პუტინს სამშვიდობო შეთანხმების პროექტს სთავაზობს. ამის შესახებ ინფორმაციას რუსული დამოუკიდებელი გამოცემა “ნოვაია გაზეტა ევროპა” თავის წყაროზე დაყრდნობით ავრცელებს.

მათი ცნობით, აღნიშნული პროექტი რუსეთსა და უკრაინას შორის მიმდინარე ომის დასრულებას ისახავს მიზნად და მას მხარს უჭერს თურქეთის პრეზიდენტი რეჯეფ თაიფ ერდოღანი.

გამოცემის წყაროს ცნობით, ამ დროისთვის რუსეთიც და უკრაინაც განიხილავენ შემოთავაზებული შეთანხმების ტექსტს, რომელიც ეყრდნობა წინასწარ მოლაპარაკებებს, რომლებიც მხარეებს შორის 2022 წელს ომის დაწყების შემდეგ მიმდინარეობდა.

წყაროს ინფორმაციით, გეგმა სავარაუდოდ, რამდენიმე ევროპელი პოლიტიკოსის მხარდაჭერას მოიპოვებს და იგი წარედგინება “გლობალური სამხრეთის” ქვეყნებსაც.

წინასწარი ინფორმაციით, სამშვიდობო შეთანხმების პროექტი შემდეგ პუნქტებს მოიცავს:

აშშ-ისა და რუსეთის მხრიდან ბირთვული იარაღის არგამოყენების შესახებ ვალდებულებებს და სტრატეგიული შეიარაღების შემცირების შეთანხმების (Start III) გაგრძელებას, იმ პუნქტით, რომ არც ერთ მხარეს არ შეეძლება შეთანხმებიდან ცალმხრივად გასვლა;

სხვა ქვეყნის შიდა საქმეებში არც ერთი ისეთი ფორმით არჩარევას, რომელიც მისი მთავრობის დესტაბილიზაციას მოახდენს;

ომის ფრონტის ხაზის გასწვრივ გაყინვას;

2040 წელს რეფერენდუმების ჩატარების ვალდებულებას: ეროვნული უკრაინული რეფერენდუმის ჩატარებას ქვეყნის საგარეო პოლიტიკაზე, საერთაშორისო დაკვირვების ქვეშ რეფერენდუმების ჩატარებას რუსეთის მიერ ანექსირებულ ყველა უკრაინულ ტერიტორიაზე;

გარანტიას, რომ 2040 წლამდე უკრაინა ბლოკებთან არმიერთებული დარჩება;

ყველა ომის ტყვის გაცვლას;

უკრაინის ევროკავშირში გაწევრიანებისთვის რუსეთის მხრიდან არშეწინააღმდეგებას.

გამოცემა აღნიშნავს, რომ ეს უკვე მეცხრე მსგავსი პროექტია და ნაკლებად სავარაუდოა, რომ ეს ბოლო შემოთავაზება მიღებული იქნება.

ალექსეი ნავალნის ქვრივმა იულიამ განაცხადა, რომ მიმდინარეობს მზადება მისი მეუღლის მემუარების გამოქვეყნებისთვის. წიგნი უკვე 11 ენაზეა თარგმნილი და ოქტომბერში გამოვა, - დაწერა იულია ნავალნაიამ სოციალურ ქსელ X-ში (ყოფილ ტვიტერში).

მისი თქმით, ალექსეი ნავალნიმ წიგნის წერა 2020 წელს მოწამვლის შემდეგ დაიწყო. ადრე მემუარების შესახებ არაფერი იყო ცნობილი.

წიგნი, რომლის სახელია „პატრიოტი“, გამომცემლობა Knopf-ი გამოსცემს და მისი საწყისი ტირაჟი 500 ათასი ეგზემპლარი იქნება, - იატყობინება New York Times-ი

გამომცემლის პრესრელიზში ნათქვამია, რომ მემუარები "გამოხატავს ნავალნის სრულ რწმენას, რომ ცვლილებებს წინააღმდეგობა არ შეიძლება და მათი დრო აუცილებლად მოვა."

ნავალნი 16 თებერვალს არქტიკაში მდებარე სპეციალური რეჟიმის კოლონიაში გარდაიცვალა. რუსეთის ხელისუფლება აცხადებს, რომ ის ბუნებრივი სიკვდილით გარდაიცვალა. მისი ოჯახი და თანამოაზრეები ამტკიცებენ, რომ პოლიტიკოსი მოკლეს. იულია ნავალნაიამ ამაში რუსეთის პრეზიდენტი ვლადიმერ პუტინი დაადანაშაულა. კრემლი ამას უარყოფს.

ამერიკული ფეხბურთის ყოფილი ვარსკვლავი, ო.ჯ. სიმპსონი, რომელიც ყოფილი ცოლისა და მისი მეგობარი მამაკაცის სასტიკ მკვლელობაში იყო ბრალდებული, 76 წლის ასაკში გარდაიცვალა. ინფორმაციას ამის შესახებ სააგენტო Reuters-ი ავრცელებს.

ოჯახის მიერ გავრცელებული ინფორმაციის თანახმად, მას სიმსივნე ჰქონდა.

1994 წელს, ფეხბურთელი ეჭვმიტანილი იყო საკუთარი მეუღლის, ნიკოლ ბრაუნისა და მისი საყვარლის, რონალდ გოლდმანის მკვლელობაში.

სიმპსონს სიკვდილით დასჯა ემუქრებოდა, მაგრამ ყველა დროის ერთ-ერთ ყველაზე გახმაურებულ სასამართლო პროცესზე სპორტსმენი უდანაშაულოდ ცნეს.

ყველაზე მასშტაბური საქმე ვიეტნამის ისტორიაში - ასე უწოდებს მედია უძრავი ქონების დეველოპერის, თროუნგ მაი ლანის საქმეს, რომლის მტკიცებულებებიც 104 სხვადასხვა ყუთშია მოთავსებული და 6 ტონას იწონის. საქმის ფარგლებში დაიკითხა 2 700 ადამიანი, სასამართლო პროცესში ჩართული იყო 10 პროკურორი და 200-მდე ადვოკატი. თროუნგ მაი ლანთან ერთად საქმეზე კიდევ 45 ადამიანი გაასამართლეს.

ქვეყნის უდიდესი ბანკის თაღლითურად ძარცვა 11 წლის განმავლობაში - ეს არის ბრალდება, რის გამოც 67 წლის თროუნგ მაი ლანს სასიკვდილო განაჩენი გამოუტანეს. მსჯავრდადებულმა საიგონის კომერციული ბანკიდან თაღლითური გზებით 44 მილიარდი აშშ დოლარის ოდენობის სესხი გამოიტანა. პროკურორების მტკიცებით, ბანკი გაცემული თანხიდან 27 მილიარდ დოლარს ვერასოდეს დაიბრუნებს.

ვიეტნამური კანონით, ფიზიკურ პირს ბანკის აქციების 5%-ზე მეტის ფლობა ეკრძალება, თუმცა პროკურორები აცხადებენ, რომ ასობით სატელიტი კომპანიისა და მის მიერ მართული ადამიანების მეშვეობით, თროუნგ მაი ლანი რეალურად ფლობდა საიგონის კომერციული ბანკის აქციების 90%-ზე მეტს.

თროუნგ მაი ლანმა საკუთარი ძალაუფლება გამოიყენა იმისთვის, რომ ჯერ საკუთარი ხალხი დაენიშნა ბანკში საპასუხისმგებლო პოზიციებზე, ხოლო შემდეგ მათ ასობით სესხის დამტკიცება დაავალა იმ სატელიტი კომპანიებისთვის, რომლებსაც თავად აკონტროლებდა. საბოლოოდ, აღმოჩნდა, რომ ამ მაქინაციების შედეგად, მის მიერ აღებულმა თანხამ ბანკის მთლიანი სესხების 93% შეადგინა.

საქმის მასალების მიხედვით, 2019 წლიდან სამი წლის განმავლობაში, მსჯავრდადებულმა თავის მძღოლს ბანკიდან 4 მილიარდ დოლარზე მეტი ნაღდი ფულის გამოტანა და სარდაფში შენახვა უბრძანა.

თროუნგ მაი ლანს ასევე ადანაშაულებენ ბანკის თანამშრომლების მოსყიდვაში. მასთან ერთად ამ საქმეზე ცენტრალური ბანკის მთავარი ინსპექტორიც გაასამართლეს, რომელსაც 5 მილიონი დოლარის ქრთამად აღებას ედავებიან.

უკრაინის უმაღლესმა რადამ მობილიზაციის შესახებ კანონპროექტი მეორე და საბოლოო მოსმენით დაამტკიცა. დოკუმენტს მხარი 283-მა დეპუტატმა დაუჭირა. მისაღებად საჭირო იყო 226 ხმა. ბოლო ორი დღის განმავლობაში უზენაესმა რადამ კანონპროექტში თითქმის 4000 ცვლილება განიხილა, თუმცა საბოლოოდ მიღებული იქნა ყველა ის ნორმა, რასაც ხელისუფლება მოითხოვდა. დოკუმენტს ხელი პრეზიდენტმა ზელენსკიმ უნდა მოაწეროს და ამის შემდეგ, ის ერთ თვეში ამოქმედდება.

დოკუმენტი ავალდებულებს 18-დან 60 წლამდე ასაკის მამრობითი სქესის ყველა მოქალაქეს, დარეგისტრირდეს სამხედრო სამსახურში და ეს ეხება საზღვარგარეთ მცხოვრებლებსაც. სამხედრო აღრიცხვის დოკუმენტის გარეშე, უკრაინელებს საკონსულო მომსახურება არ ექნებათ. მობილიზაციისთვის გაწვევის ასაკი 27-დან 25 წლამდე შემცირდა. ხოლო მათთვის, ვინც თავს აარიდებს სამხედრო სამსახურს, ვერ იმუშავებს საჯარო სამსახურში, მათ შორის, ვერს სამართალდამცავ ორგანოებში, შეიძლება ჩამოერთვას მართვის მოწმობაც. ჯარიმები გაიზრდება ჯარისგან თავის არიდების შემთხვევაში.

გადავადება, ან გაწვევიდან გათავისუფლება ეხევათ შშმ პირებს, სამი და მეტი მცირეწლოვანი შვილის მამებს, სამართალდამცავებს, სტუდენტებსა და კურსდამთავრებულებს, რომლებიც მიიღებენ პირველად განათლებას, სამეცნიერო და პედაგოგიურ სფეროში. 

ფილადელფიაში, მეჩეთთან, რამადანის დღესასწაულის დასრულების აღნიშვნის დაწყებამდე, სროლის შედეგად, სულ მცირე, ორი ადამიანი დაიღუპა, - ამის შესახებ ინფორმაციას BBC ავრცელებს.

სროლის ფაქტთან დაკავშირებით დაკავებულია ოთხი ადამიანი. შემთხვევა ეიდ ალ-ფიტრის მეჩეთის გარეთ მოხდა. პოლიციის ცნობით, სროლის ფაქტთან დაკავშირებით დაკავებულია ოთხი ადამიანი. დაშავებულთაგან ერთ-ერთი არასრულწლოვანია.

ირლანდიას ახალი პრემიერ-მინისტრი ჰყავს. პარლამენტმა მთავრობის მეთაურის თანამდებობაზე, საიმონ ჰარისის კანდიდატურას მხარი დაუჭირა.

37 წლის საიმონ ჰარისი, ქვეყნის ისტორიაში ყველაზე ახალგაზრდა პრემიერია. მანამდე ის განათლების მინისტრის თანამდებობას იკავებდა.

პრემიერის თანამდებობა ვაკანტური გასულ თვეს გახდა, როდესაც ლეო ვარადქარმა 20 მარტს, მოულოდნელად თანამდებობიდან წასვლის შესახებ განაცხადა.