15 აპრილს დონალდ ტრამპი გახდება აშშ-ის პირველი ყოფილი პრეზიდენტი, რომელიც სისხლის სამართლის საქმეზე სასამართლოს წინაშე წარდგენა. საქმე პორნოვარსკვლავ სტორმი დენიელსისთვის დუმილის სანაცვლოდ ფულის გადახდას ეხება.

დონალდ ტრამპს სისხლის სამართლის ოთხ საქმეზე აქვს ბრალი წარდგენილი, თუმცა ეს შეიძლება ერთადერთი იყოს, რომლის სასამართლო პროცესი ნოემბრის არჩევნებამდე დაიწყება.

აშშ-ის ყოფილი პრეზიდენტი ყველა ბრალს უარყოფს და მათ პოლიტიკურად მოტივირებულებს უწოდებს.

ორშაბათს ადვოკატებთან ერთად სასამართლოში ყოფნის შემდეგ ტრამპმა ჟურნალისტებს განუცხადა, რომ საქმე "არჩევნებში ჩარევად" უნდა განიხილონ.

"ეს სირცხვილია და ჩვენ, რა თქმა უნდა, აპელაციას შევიტან. ამომრჩევლის დაშინებისა და არჩევნებში ჩარევის შემთხვევაა და ეს არ უნდა დავუშვათ", - განაცხადა ტრამპმა.

ნიუ-იორკის სასამართლო პროცესი 25 მარტს უნდა დაწყებულიყო, მაგრამ ტრამპის ადვოკატებმა მოსამართლეს მიმართეს, პროცესი 90 დღით გადაედო, რათა საქმეში ახლად აღმოჩენილი გარემოებები განეხილათ. მოსამართლემ მათ 20 დღე მისცა.

მოსამართლე მერჩანმა ორშაბათს მოსმენა გამართა, რომელიც ეხებოდა იმას, იყო თუ არა რაიმე კანონდარღვევა გასულ კვირას, მოულოდნელად, 200 000-ზე მეტი გვერდი დოკუმენტის გამოქვეყნებისას, რომელიც საქმეს ეხებოდა.

სტორმის დენიელსის საქმის საქმის მასალების თანახმად, 2016 წლის საპრეზიდენტო არჩევნებამდე ტრამპმა მისი ადვოკატის დახმარებით დენიელსს 130 ათასი დოლარი გადაუხადა, რათა მასთან სექსუალური კავშირის შესახებ არაფერი ეთქვა. თვითონ გადახდა უკანონო არ ყოფილა, მაგრამ პროკურორები ამბობენ, რომ ის გაფორმებული იყო, როგორც ადვოკატის ხელფასი იურიდიული სამსახურისთვის, რაც შტატში ანგარიშვალდებულების გაყალბებად მიიჩნევა და სისხლის სამართლებრივად ისჯება.

ადვოკატ მაიკლ კოენს აღნიშნულ საქმეზე 2018 წელს 3 წლით თავისუფლების აღკვეთა მიუსაჯეს, თუმცა ტრამპს, რომელსაც მაშინ პრეზიდენტის თანამდებობა ეკავა, ოფიციალური ბრალი არ წაუყენეს.

გარდა ამისა ტრამპს სამ საქმეზე აქვს ბრალი წარდგენილი. საიდუმლო დოკუმენტების შენახვის საქმის პროცესი მაისშია ჩანიშნული, ხოლო ჯორჯიის შტატის ხელისუფლება ამ შტატში საპრეზიდენტო არჩევნების შედეგების შეცვლის მცდელობის საქმეზე განხილვის დაწყებას აგვისტოში მოითხოვს.

კიდე ერთი პროცესი არჩევნების შედეგების გასაუქმებლად შეთქმულების მოწყობასა და კაპიტოლიუმზე შტურმში ტრამპის როლს გულისხმობს.

გაეროს უშიშროების საბჭომ რეზოლუცია მიიღო, რომელიც ისრაელსა და „ჰამასს“ შორის ღაზის სექტორში ცეცხლის დაუყოვნებლივ შეწყვეტასა და მძევლების უპირობოდ გათავისუფლებას მოითხოვს.

აღსანიშნავია, რომ აშშ-მა ვეტოს უფლება არ გამოიყენა და თავი შეიკავა კენჭისყრის დროს.

ომის დაწყების შემდეგ, ეს პირველი შემთხვევაა, როდესაც გაეროს უშიშროების საბჭომ მიიღო რეზოლუცია ღაზაში ცეცხლის დაუყოვნებლივ შეწყვეტის მოთხოვნით.

საგარეო პოლიტიკის საკითხებში ევროკომისიის სპიკერმა, პიტერ სტანომ განაცხადა, რომ არაფერი მიუთითებს უკრაინის მონაწილეობაზე მოსკოვის მახლობლად განხორციელებულ ტერაქტში, რომლის გარშემოც კრემლი სპეკულაციას თესავს.

„რა თქმა უნდა, ჩვენ სრულიად უარვყოფთ ამ ბრალდებებს. არ არსებობს არანაირი ნიშანი, არანაირი მტკიცებულება, რომ უკრაინა რაიმე კავშირშია ამ ტერაქტთან“, - აღნიშნა პიტერ სტანომ.

მან მოუწოდა რუსეთის მთავრობას, არ გამოიყენოს ტერაქტი უკრაინის წინააღმდეგ უკანონო აგრესიის გაძლიერების საბაბად.

დღეს, 25 მარტს ოკუპანტებმა ოკუპირებული ყირიმიდან კიევზე ორი ბალისტიკური რაკეტით კიევზე იერიში მიიტანეს. უკრაინის საჰაერო ძალების განცხადებით, ორივე რაკეტა განადგურებულია. შეტევა დაახლოებით 10:30 საათზე დაიწყო. 

კიევის მერის, ვიტალი კლიჩკომ აღნიშნა, რომ დაზიანებულია მრავალსართულიანი შენობა. მისივე თქმით, სასწრაფო დახმარების სამსახურები დედაქალაქის რამდენიმე უბანში არიან გადანაწილებული. 

ბოლო მონაცემებით, ვრცელდება ინფორმაცია რამდენიმე დაშავებულის შესახებ. დედაქალაქის ხელისუფლება იტყობინება, რომ რაკეტის ნამსხვრევები კიევის რამდენიმე რაიონში ჩამოვარდა. 

სომხეთის დედაქალაქ ერევანში შეიარაღებულმა პირებმა პოლიციის შენობაში შეჭრა სცადეს. განყოფილებასთან აფეთქებების ხმა ისმოდა.

ადგილობრივი მედიის ინფორმაციით, შედეგად ორი თავდამსხმელი დაშავდა. ადგილზე სპეცდანიშნულების რაზმი იყო მობილიზებული.

რამდენიმე საათიანი სპეცოპერაციის შედეგად, სამართალდამცველებმა სამივე პირი დააკავეს. დაჭრილები სამედინიცინო დაწესებულებებში არიან გადაყვანილი.

მომხდარის მოტივი უცნობია, თუმცა გამოძიება ტერორიზმის მუხლით დაიწყო.

24 მარტს ღამით მოსკოვის ბასმანის სასამართლომ დააპატიმრა მოსკოვის გარეუბანში „კროკუს სიტი ჰოლის“ საკონცერტო დარბაზში შეიარაღებულ თავდასხმაში ბრალდებული ოთხი პირი. 22 მარტის ტერაქტს 137 ადამიანის სიცოცხლე ემსხვერპლა, 182 დაშავდა.

დალერჯონ მირზოევს, მუროდალი რაჩაბალიზოდეს, მუჰამადსობირ ფაიზოვს და შამსიდინ ფარიდუნის სამუდამო პატიმრობა ემუქრებათ ტერორიზმის ბრალდებით. პატიმრობის შესახებ სხდომა დახურულ კარს მიღმა ჩატარდა.

ბრაზილიაში ძლიერი წვიმის შედეგად გამოწვეულ წყალდიდობასა და მეწყერს, სულ მცირე, 25 ადამიანი ემსხვერპლა. როგორც DW წერს, შემთხვევა ესპირიტუ-სანტსას შტატსა და ქალაქ რიო დე ჟანეიროში მოხდა.

განადგურებულია 270-ზე მეტი საცხოვრებელი სახლი. ევაკუირებულია 5 400-ზე მეტი ადამიანი. სამძებრო-სამაშველო სამუშაოებში ათობით ჯარისკაცი და მეხანძრე-მაშველია ჩართული და კვლავ გრძელდება.

ნიგერიაში გატაცებული 300-მდე მოსწავლე გაათავისუფლეს. ამის შესახებ კადუნას შტატის გუბერნატორმა, უბა სანიმ სოციალურ ქსელში დაწერა.

"კურიგას სკოლის გატაცებული ბავშვები უვნებლად გაათავისუფლეს..." -განაცხადა უბა სანიმ, მაგრამ მას გათავისუფლების დეტალები არ დაუკონკრეტებია. მან ასევე მადლობა გადაუხადა ნიგერიის პრეზიდენტს ბოლა ტინუბუს და თქვა: "მთელი ამ დროის განმავლობაში ის ჩვენთან ერთად მუშაობდა ბავშვების უსაფრთხოდ დასაბრუნებლად."

შეგახსენებთ, რომ შეიარაღებულმა ბანდიტებმა, 7 მარტს, სკოლიდან 300-მდე მოსწავლე გაიტაცეს. გასულ კვირას გამტაცებლებმა, გათავისუფლების სანაცვლოდ 1 მილიარდი ნაირა (620 000 აშშ დოლარი) გამოსასყიდი მოითხოვეს.

"პუტინი პათოლოგიური მატყუარაა", - ამის შესახებ უკრაინის საგარეო საქმეთა მინისტრი, დმიტრო კულება სოციალურ ქსელში წერს და მოსკოვში მომხდარ ტერაქტთან დაკავშირებით პუტინის განცხადებას ეხმაურება.

დღეს საქართველოს კათოლიკური ეკლესია, სომეხთა მართლმადიდებელი ეკლესიის საქართველოს ეპარქია და საქართველოს ევანგელურ-ლუთერული ეკლესია ბზობას დღესასწაულობენ.

ამის შესახებ რელიგიის საკითხთა სახელმწიფო სააგენტო ავრცელებს.

„ბზობა ერთ-ერთი მთავარი საუფლო დღესასწაულია და იერუსალიმში მაცხოვრის დიდებით შესვლას განასახიერებს.

რელიგიის საკითხთა სახელმწიფო სააგენტო გილოცავთ ამ დიდ დღესასწაულს, სიხარულსა და მშვიდობას გისურვებთ“, - აღნიშნულია ინფორმაციაში.

რუსეთში „კროკუს სითი ჰოლზე“ განხორციელებული თავდასხმის შედეგად დაღუპულებს გლოვობენ.

24 მარტის გლოვის დღედ გამოცხადების შესახებ გუშინ რუსეთის პრეზიდენტმა, ვლადიმერ პუტინმა სპეციალურ მიმართვაში განაცხადა.

გლოვის დღის აღსანიშნავად ქვეყანაში სახელმწიფო დროშები დაშვებულია და კულტურულ დაწესებულებებს გასართობი ღონისძიებების გაუქმების რეკომენდაცია აქვთ მიცემული. ამასთან, ტელეარხებზე უარს ამბობენ სარეკლამო და გასართობ პროგრამებზე.

შეგახსენებთ, მოსკოვში, „კროკუს სითი ჰოლზე“ განხორციელებული თავდასხმის შედეგად დაღუპულთა რაოდენობა 133-მდე გაიზარდა. რუსეთის უშიშროების ფედერალური სამსახურის განცხადებით, 11 ადამიანი დააკავეს, მათ შორის ოთხი „კროკუს სითი ჰოლზე“ განხორციელებულ თავდასხმაში მონაწილეობდა.

ამერიკის შეერთებული შტატების პრეზიდენტმა ჯო ბაიდენმა ხელი მოაწერა 1.2 ტრილიონი დოლარის ოდენობის ბიუჯეტს და წარმომადგენელთა პალატას შეახსენა, რომ უკრაინის, ისრაელის და ტაივანის დახმარების კანონი მიიღონ.

მანამდე აშშ-ს სენატმა საბიუჯეტო დაფინანსების კანონი მიიღო, რითაც ქვეყნის მთავრობა სექტემბრამდე დაფინანსდება.

"მინდა მკაფიოდ განვაცხადო - კონგრესის მუშაობა არ დასრულებულა. წარმომადგენელთა პალატამ უნდა მიიღოს ორპარტიული კანონი უკრაინის, ისრაელის და ტაივანის დამატებით დაფინანსებაზე...", - თქვა ბაიდენმა.

მისივე თქმით, კანონი, რომელსაც ხელი მოაწერა აგრძელებს მთავრობის მუშაობას, რესურს დებს ამერიკელ ხალხში, აძლიერებს ეკონომიკას და ეროვნულ უსაფრთხოებას.

"ეს შეთანხმება არის კომპრომისი, რაც ნიშნავს იმას, რომ არც ერთმა მხარემ არ მიიღო ყველაფერი, რაც უნდოდა", - აღნიშნა აშშ-ის ლიდერმა.

კანონპროექტი ეხება მთავრობის კრიტიკული ოპერაციების, მათ შორის თავდაცვის, შიდა უსაფრთხოების, შრომის, ჯანმრთელობისა და ადამიანური სერვისების, განათლების, სახელმწიფო და საკანონმდებლო ორგანოების დეპარტამენტების დაფინანსებას.