თურქეთის აღმოსავლეთით სამ პროვინციაში ძლიერი თოვის გამო 158 დასახლებული პუნქტი ჩაიკეტა. ამის შესახებ ინფორმაციას თურქული მედია ავრცელებს და წერს, რომ ვანის პროვინციაში ჩაიკეტა 11 გზა, მუშში - 102, ბითლისში - 45.

"ვანის, ბითლისისა და მუშის პროვინციებში თოვლის გამო 158 დასახლებულ პუნქტთან კავშირი არ არის," - ნათქვამია განცხადებაში.

გზების გაწმენდისა და დასახლებულ პუნქტებთან მისასვლელი სამუშაოები ამ დრომდე გრძელდება.

გერმანია უკრაინას 500 მილიონი ევროს ღირებულების სამხედრო დახმარების ახალ პაკეტს გამოუყოფს - გერმანიის თავდაცვის მინისტრმა ბორის პისტორიუსმა ამის შესახებ უკრაინის თავდაცვის საკითხებზე საკონტაქტო ჯგუფის („რამშტაინი-20“) შეხვედრაზე განაცხადა, რომელიც დღეს გერმანიაში მიმდინარეობს.

დახმარება მოიცავს  10 ათას ჭურვს. 

”ჩვენ კვლავ შევადგინეთ დახმარების პაკეტი, რომლის ღირებულებაა თითქმის ნახევარი მილიარდი ევრო,” - განაცხადა პისტორიუსმა. 

უნდა გავზარდოთ სასაზღვრო ძალების საბრძოლო მზადყოფნა, პირველ რიგში შავ ზღვაში - რუსეთის პრეზიდენტი, ვლადიმერ პუტინი ამბობს, რომ აუცილებელია სასაზღვრო ორგანოების საბრძოლო შესაძლებლობებისა და მობილური ჯგუფების ეფექტურობის გაზრდა არა მხოლოდ სახმელეთო, არამედ საზღვაო მიმართულებებითაც.

„ჩვენ კიდევ უფრო უნდა გავზარდოთ სასაზღვრო უწყებების საბრძოლო შესაძლებლობები და მობილური ჯგუფების ეფექტურობა არა მხოლოდ სახმელეთო, არამედ საზღვაო მიმართულებითაც. პირველ რიგში, რა თქმა უნდა, ეს დღეს შავ ზღვას ეხება", - განაცხადა პუტინმა რუსეთის უშიშროების ფედერალური სამსახურის საბჭოს გაფართოებულ შეხვედრაზე.

უკრაინის ომიდან დაბრუნებულმა ალექსეი ისაკოვმა 18 მარტს სანქტ-პეტერბურგის რესტორან „ჩაბრეთში“ თავისი მეგობარი გასროლით მოკლა. როგორც გამოცემა „ფონტანკა“ წერს, ისაკოვი "დარწმუნებული იყო", რომ ბიზნესპარტნიორს მისი შვიდი მილიონი რუბლი მართებდა, რაც მათ შორის დავის საგანი გახდა. დაზარალებულმა შეხვედრაზე მხოლოდ ამ თანხის ნაწილი მიიტანა.

პორტალ „ბუმაგის“ მიერ გამოქვეყნებულ ოპერატიულ ვიდეოზე მოჩანს ორ კაცი, რომლებიც მაგიდასთან სხედან და სადილობენ. უცებ ერთ-ერთი მათგანი იარაღს იღებს და მეორეს ესვრის. დაჭრილი ახერხებს წამოდგომას, მაგრამ მაგიდის გვერდით ეცემა, ამ დროს მეორე მასთან მიდის და კიდევ რამდენჯერმე ისვრის. ამის შემდეგ, მსროლელი ბრუნდება მაგიდასთან და ფეხზე მდგარი აგრძელებს ჭამას.

ვრცელდება ინფორმაცია, რომ ეჭვმიტანილი დაკავებულია. მომხდარზე აღძრულია სისხლის სამართლის საქმე მკვლელობის მუხლით (სისხლის სამართლის კოდექსის 105-ე მუხლის პირველი ნაწილი). რადიო თავისუფლების რუსული სამსახურის ცნობით, ალექსეი ისაკოვი ნასამართლევია. 2021 წლის მაისში ქურდობის რამდენიმე ეპიზოდისთვის მას სამ-ნახევარი წლით პატიმრობა მიუსაჯეს. მაგრამ რუსეთის მიერ უკრაინის წინააღმდეგ დაწყებული სრულმასშტაბიანი ომის დაწყების შემდეგ, ისაკოვმა კოლონია დატოვა და საომრად უკრაინაში წავიდა.

უკრაინაში შეჭრის შემდეგ რუსეთის ციხეებიდან რეგულარულად ათავისუფლებენ მკვლელებს, მოძალადეებსა და სხვა მძიმე დანაშაულისთვის მსჯავრდადებულებს. მოკლულთა და დაზარალებულთა ოჯახის წევრები პროტესტს გამოთქვამენ, თუმცა უშედეგოდ.

რუსი ჟურნალისტების შეფასებით, რუსეთის პრეზიდენტმა ვლადიმირ პუტინმა შეიწყალა მინიმუმ 17 ადამიანი, რომლებიც ნასამართლევი იყვნენ მკვლელობისთვის. ყველა მათგანმა მიიღო მონაწილეობა უკრაინის ომში და ფრონტიდან დაბრუნების შემდეგ გათავისუფლდა. ნაწილმა უკვე მოასწრო ახალი დანაშაულის ჩადენა.

ასევე ვადამდე გაათავისუფლეს ყოფილი პოლიციელი სერგეი ხაჯიკურბანოვი, რომელსაც 2014 წელს 20 წლით თავისუფლების აღკვეთა მიუსაჯეს „ნოვაია გაზეტას“ ჟურნალისტ ანა პოლიტკოვსკაიას მკვლელობაში მონაწილეობისთვის. ხაჯიკურბანოვი, სხვა შეწყალებულ პატიმრებთან ერთად, მონაწილეობდა უკრაინის წინააღმდეგ ომში კერძო სამხედრო კომპანიის რიგებში. კონტრაქტით გათვალისწინებული ვადის გასვლის შემდეგ გათავისუფლდა და ახლა კი, როგორც კონტრაქტით დაქირავებული მონაწილეობს ომში.

ევროკავშირის საგარეო საქმეთა მინისტრებმა ალექსეი ნავალნის სიკვდილის გამო 30-მდე ფიზიკური და იურიდიული პირისთვის სანქციები შეათანხმა. ვინ იქნებიან სანქცირებულთა სიაში, უცნობია.

თებერვალში დიდმა ბრიტანეთმა სანქციები გაატარა იმ რუსული კოლონიის ხელმძღვანელობის მიმართ, სადაც ნავალნი დაიღუპა.

ბრიუსელში შეხვედრის შემდეგ ჯოზეფ ბორელმა განაცხადა, რომ ევროკავშირის 27 წევრი ქვეყნის მინისტრები შეთანხმდნენ, სანქციები გაეტარებინათ იმ პირების მიმართ, ვინც ნავალნის სიკვდილზეა პასუხისმგებელი.

ევროპული საბჭოს პრეზიდენტი, შარლ მიშელი ამბობს, რომ უკრაინაში რუსეთის შეჭრის შემდეგ ევროკავშირი "ომის ეკონომიკის" რეჟიმზე უნდა გადავიდეს და გააკეთოს ყველაფერი ომში უკრაინის გამარჯვების უზრუნველსაყოფად.

ამის შესახებ მიშელი ევროპულ გაზეთებსა და Euractiv-ის ვებსაიტზე გამოქვეყნებულ სტატიაში - "თუ ჩვენ გვინდა მშვიდობა, უნდა მოვემზადოთ ომისთვის", საუბრობს, სადაც იგი აღწერს იმ ნაბიჯებს, რომლებიც ევროკავშირმა არსებული ამოცანების შესასრულებლად უნდა გადადგას.

შარლ მიშელი იხსენებს უკრაინაში ომის დაწყების საწყის დღეებში გამართულ სატელეფონო საუბარს პრეზიდენტ ვოლოდიმირ ზელენსკისთან. ევროპული საბჭოს ხელმძღვანელი წერს, პუტინის მიერ უკრაინაში სრულმასშტაბიანი შეჭრის შემდეგ "მთელი უსაფრთხოების სისტემა, რომელიც არსებობდა მეორე მსოფლიო ომის შემდეგ, სამუდამოდ შეიცვალა" და საჭიროა, ევროკავშირმაც შესაბამისი ცვლილებები განიცადოს.

"ომის დაწყებიდან ორი წლის შემდეგ ცხადი გახდა, რომ რუსეთი უკრაინაში არ გაჩერდება - ისევე როგორც ყირიმში არ გაჩერებულა 10 წლის წინ. კრემლი აგრძელებს სიტუაციის დესტაბილიზაციას მოლდოვაში, საქართველოში, სამხრეთ კავკასიაში, დასავლეთ ბალკანეთშია და აფრიკის ქვეყნებშიც კი", - თქვა მიშელმა.

შარლ მიშელი ასევე აცხადებს, რომ რუსეთი სერიოზულ საფრთხეს უქმნის ევროპისა და მსოფლიოს უსაფრთხოებას, ხოლო თუ ევროკავშირი საჭირო პასუხს არ გასცემს და უკრაინას საკმარისს დახმარებას არ მიაწვდის, პუტინის აგრესიის მორიგი სამიზნე სწორედ გაერთიანება იქნება. აქედან გამომდინარე ევროპული საბჭოს პრეზიდენტი ევროპას ეკონომიკისადმი მიდგომის გადახედვას და დღის წესრიგში თავდაცვის საკითხების წინ წამოწევისკენ მოუწოდებს.

"ჩვენ უნდა მოვემზადოთ თავდაცვისთვის და გადავიდეთ "ომის ეკონომიკის" რეჟიმში. დროა ავიღოთ პასუხისმგებლობა ჩვენს უსაფრთხოებაზე. ჩვენ აღარ შეგვიძლია სხვებზე დაყრდნობა ან ვიყოთ აშშ-ის ან სხვა რომელიმე ქვეყნის არჩევნებზე დამოკიდებული", - თქვა მან

ღაზის სექტორში ჰუმანიტარული ვითარება ევროკომისიის პრეზიდენტმა ურსულა ფონ დერ ლაიენმა ეგვიპტეში, პრეზიდენტ სისისთან გამართული შეხვედრისას განიხილა. მხარეებმა ანკლავში ცეცხლის შეწყვეტის აუცილებლობაზე ისაუბრეს და განაცხადეს, რომ ზავის გარეშე ღაზას შიმშილი ემუქრება.

„შემაშფოთებელია ის კატასტროფული ჰუმანიტარული ვითარება, რომელიც ღაზის სექტორში ომითაა გამოწვეული. ღაზას შიმშილი ემუქრება და ჩვენ ეს არ უნდა დავუშვათ. უკიდურესად მნიშვნელოვანია ცეცხლის შეწყვეტის შესახებ შეთანხმების მიღწევა, რაც მძევლების გათავისუფლებისა და ღაზაში უფრო მეტი ჰუმანიტარული დახმარების მიწოდების საშუალებას იძლევა“, - აღნიშნა ევროკომისიის პრეზიდენტმა ურსულა ფონ დერ ლაიენმა.

რუსეთის საპრეზიდენტო არჩევნებში ხმების 87,34% მიიღო ქვეყნის მოქმედმა პრეზიდენტმა ვლადიმირ პუტინმა. რუსეთის ცენტრალური საარჩევნო კომისიის მიერ დღეს, 18 მარტს, გამოქვეყნებული ეს შედეგი ოქმების 98%-ის დამუშავებით მიღებულ მონაცემებს ეფუძნება.

პუტინმა ყველაზე მეტი ხმა, 98,99% ჩეჩნეთში მიიღო. ოფიციალური შედეგებით, რუსეთის დედაქალაქ მოსკოვში პუტინის მხარდაჭერა 85,57%-ია.

მეორე ადგილზეა სახელმწიფო დუმის კომუნისტი დეპუტატი ნიკოლაი ხარიტონოვი(4,3%). მას მოსდევს დუმის ვიცე-სპიკერი, პარტია „ახალი ხალხის“ კანდიდატი ვლადისლავ დავანკოვი(3,8%). მეოთხე ადგილზეა „ლიბერალ-დემოკრატიული პარტიის“ თავმჯდომარე ლეონიდ სლუცკი(3,17).

რუსეთის საპრეზიდენტო არჩევნებში, რომელიც 15-17 მარტს ჩატარდა, პუტინის გარდა, მონაწილეობდა ის სამი კანდიდატი, რომლებსაც ცენტრალური საარჩევნო კომისიის გადაწყვეტილებით, ყველა დოკუმენტი წესრიგში ჰქონდათ. მათ შორის ვერ მოხვდა, მაგალითად, ოპოზიციონერი პოლიტიკოსი ბორის ნადეჟდინი, რომელიც სხვა კანდიდატებისგან განსხვავებით პუტინს და უკრაინის წინააღმდეგ ომს ღიად აკრიტიკებდა.

დამოუკიდებელი დამკვირვებლების შეფასებით, 2024 წლის საპრეზიდენტო არჩევნები მასშტაბური დარღვევებით ჩატარდა, მათ შორის იყო საარჩევნო ურნებში ბიულეტენების ჩაყრა, ხმის მიცემის ფარულობის დარღვევა და საბიუჯეტო ორგანიზაციების თანამშრომელთა იძულება.

სამდღიანი კენჭისყრისას მოქალაქეების ნაწილი პროტესტს სხვადასხვა ფორმით გამოხატავდა. მათ შორის, არაერთ ქალაქში საარჩევნო ყუთებს საღებავი შეასხეს და უბნებზე ხანძარი გააჩინეს. რუსეთის შსს-ს ოფიციალური მონაცემებით, მსგავს ფაქტებზე სისხლის სამართლის 33 საქმე აღძრეს.

17 მარტს, კენჭისყრის ბოლო დღეს, რუსეთის და მსოფლიოს სხვადასხვა ქალაქში გაიმართა საპროტესტო აქცია „შუადღე პუტინის წინააღმდეგ". მისი ინიციატორები იყვნენ ციმბირის კოლონიაში 2024 წლის თებერვალში გარდაცვლილი ოპოზიციონერი პოლიტიკოსის, ალექსეი ნავალნის თანამოაზრეები.

დამოუკიდებელი უფლებადამცველი მედიაპროექტის, ОВД-Инфо-ს ცნობით, 18 მარტის 04:24 საათისთვის ცნობილია, რომ რუსეთის 21 ქალაქში სულ მცირე 86 ადამიანი დააკავეს. ყველაზე მეტი, 28 - ყაზანში.

რუსეთის საარჩევნო ადმინისტრაციის წინასწარი მონაცემებით, 2024 წლის საპრეზიდენტო არჩევნებში ამომრჩეველთა აქტივობამ 74,22% შეადგინა. წინა, 2018 წლის არჩევნებში ეს მაჩვენებელი 67,54% იყო. 2018 წლის საპრეზიდენტო არჩევნებში პუტინმა ხმების 76,69%-ით გაიმარჯვა.

ვლადიმირ პუტინი მეხუთე ვადით ხდება რუსეთის პრეზიდენტი.

პუტინის საპრეზიდენტო არჩევნების მესამე დღე - გამოცემა "მედუზა" "OVD-Info"-ზე დაყრდნობით წერს, რომ დღეს სამართალდამცველებმა რუსეთის 14 ქალაქში 50-ზე მეტი ადამიანი დააკავეს. უფლებადამცველების თქმით, დაკავებების ყველაზე მეტი რაოდენობა ყაზანსა და მოსკოვში დაფიქსირდა. 

შეგახსენებთ, რომ რუსეთში საპრეზიდენტო არჩევნების სამდღიანი ხმის მიცემის პროცესი 15 მარტს დაიწყო და დღეს დასრულდება. ვლადიმერ პუტინი რუსეთის პრეზიდენტი მეხუთე ვადით ხდება. მის გარდა, არჩევნებში ფორმალურად 3 კანდიდატი მონაწილეობს. რუსეთი "არჩევნებს" მის მიერ ოკუპირებულ რეგიონებშიც ატარებს, რასაც საერთაშორისო თანამეგობრობა გმობს.

მოსკოვსა და რუსეთის ზოგიერთ რაიონში დღეს საპროტესტო აქცია სახელწოდებით "შუადღე პუტინის წინააღმდეგ" მიმდინარეობს. ამ იდეის ავტორები კრიტიკულად განწყობილ ამომრჩეველს მოუწოდებდნენ, რომ გამოსულიყვნენ საარჩევნო უბნებზე, ერთდროულად (12:00 საათზე) შეკრებილიყვნენ პუტინის წინააღმდეგ ხმის მისაცემად ანდა კენჭისყრის ჩასაშლელად. პუტინის წინააღმდეგ დღეს აქცია გამართეს თბილისში მცხოვრებმა რუსებმაც.

სამხრეთ ისლანდიაში, რეიკიანესის ნახევარკუნძულზე ვულკანის მორიგი ამოფრქვევის გამო, საგანგებო მდგომარეობა გამოცხადდა. ინფორმაციას BBC-ი ავრცელებს.

გამოცემის ცნობით, ლავამ ევაკუირებული ქალაქ გრინდავიკის გარშემო არსებულ თავდაცვის კედლებამდე მიაღწია. აღსანიშნავია, რომ სახლებში დაბრუნების უფლება ერთი თვის წინ ქალაქის მხოლოდ 4 000-მდე მცხოვრებს მისცეს მას შემდეგ, რაც იანვარში ამოფრქვევის შედეგად ის ქალაქში გავრცელდა და სამი სახლი გაანადგურა.

ვულკანის ამოფრქვევის გამო, ისლანდიის ერთ-ერთი ყველაზე პოპულარული ტურისტული ადგილიდან, გეოთერმული სპა ლურჯი ლაგუნის ტერიტორიიდან, 500-600 ადამიანის ევაკუაცია განხორციელდა. კეფლავიკის საერთაშორისო აეროპორტი და სხვა რეგიონული აეროპორტები არ დაზიანებულა.

ქვეყნის სამოქალაქო თავდაცვის სამსახურის ცნობით, ამოფრქვევა შაბათს საღამოს, გრინდავიკის ჩრდილოეთით, ჰაგაფელსა და სტორა-სკოგფელს შორის დაიწყო.

საფრანგეთის პრეზიდენტის, ემანუელ მაკრონის განცხადებით, ის აუცილებლად ეწვევა უკრაინას.

მაკრონმა განმარტა, რომ მისი ვიზიტი შედგება მაშინ, როდესაც მზად იქნება „კონკრეტული წინადადებები და კონკრეტული გადაწყვეტილებები“.

"აბსოლუტურად გულწრფელად გეტყვით - აუცილებლად ჩამოვალ, მე მაქვს წესი: ჩემი ვიზიტი მაქსიმალურად სასარგებლო იყოს უკრაინისთვის. მე ჩამოვალ უკრაინაში კონკრეტული წინადადებებით, კონკრეტული გადაწყვეტილებებით“, - განაცხადა საფრანგეთის პრეზიდენტმა უკრაინულ მედიასთან ინტერვიუში.

მაკრონის თქმით, მისი ვიზიტი იქნება "ძლიერი გზავნილი და თანამშრომლობის ახალი მიმართულებები".

შეგახსენებთ, ორშაბათს ელისეის სასახლემ განაცხადა, რომ საფრანგეთის პრეზიდენტი ემანუელ მაკრონი უკრაინას უახლოეს კვირებში ეწვევა.

მოსკოვში, საარჩევნო უბნებთან, ადგილობრივი დროით 12:00 საათიდან ხალხმა შეკრება დაიწყო, მოსკოვის ცენტრალურ რაიონებსა და ცენტრის გარეთ რიგები ფიქსირდება, - ინფორმაციას „მედუზა“ ავრცელებს.

აქციის : „შუადღე პუტინის წინააღმდეგ“ იდეა, რომელიც 17 მარტს, 12:00 საათზე საარჩევნო უბნებზე მისვლას და ამჟამინდელი პრეზიდენტის წინააღმდეგ ხმის მიცემის ან ბიულეტენის დაზიანებას ითვალისწინებს, სანქტ-პეტერბურგის საკანონმდებლო ასამბლეის ყოფილ დეპუტატს, მაქსიმ რეზნიკს ეკუთვნის.

სიკვდილამდე ცოტა ხნით ადრე, აქციის მიმართ მხარდაჭერა გამოხატა ოპოზიციონერმა პოლიტიკოსმა, ალექსეი ნავალნიმ.

ნავალნის გარდაცვალების შემდეგ მისმა თანაგუნდელებმა საზოგადოებას პოლიტიკოსის უკანასკნელი სურვილების ასრულებისკენ მოუწოდეს და ვლადიმერ პუტინის ყველა ოპონენტს შესთავაზეს, 17 მარტს, 12:00 საათზე, საარჩევნო უბნებზე ერთდროულად მივიდნენ.